Shymkentte jol boıynda tóbelesken avtobýs júrgizýshilerine qatysty qylmystyq is qozǵaldy
ShYMKENT. QazAqparat - Shymkentte joldyń boıynda tóbelisip qalǵan avtobýs júrgizýshilerine qatysty qylmystyq is qozǵaldy. Bul týraly Shymkent qalalyq jergilikti polıtsııa qyzmetiniń bastyǵy Danııar Meıirhan málim etti, dep habarlaıdy «QazAqparat HAA tilshisi.
Onyń sózinshe, qazirgi tańda eki júrgizýshige qatysty Qylmystyq kodekstiń 293 baby «Buzaqylyq» boıynsha qylmystyq is qozǵalyp, sotqa deıingi tergeý amaldary júrgizilýde. Іsti Ál-Farabı aýdandyq polıtsııa bóliminiń anyqtaýshylary qaraýda. Al, eki júrgizýshiniń judyryqtasýyna aıaldamadaǵy oryn men kóp jolaýshyny mingizý úshin talas sebep bolypty.
Eske salaıyq, kúni keshe ǵana qala kósheleriniń birinde eki avtobýs júrgizýshisiniń tóbeleskeni jaıly vıdeo áleýmettik jelilerge tarap ketken bolatyn. Keıinnen avtobýs tizgindegenderdiń shahardaǵy jolaýshy tasymaldaıtyn «Green bus» kompanııasynyń júrgizýshileri ekeni belgili boldy. Olar qoǵamdyq kólikterdiń júrgizýshileri bola tura jolaýshylardyń kózinshe tóbelesip, bir-birine qol jumsaǵan. Keıinnen qos júrgizýshiniń ersi qylyqtarynan habardar bolǵan kompanııa basshylyǵy ekeýiniń de jumystan shyǵarylǵanyn málim etti.
