Shymkentte joǵalyp ketken 1,5 jasar búldirshin tabyldy
ShYMKENT. QazAqparat - Shymkentte joǵalyp ketken 1,5 jasar búldirshin bir táýlikten keıin tabyldy. Kishkentaı Janııa men onyń ápkesin qala turǵyndary Samal móltek aýdanyndaǵy aýrýhananyń aldynan kórip qalyp, polıtsııany shaqyrtqan, dep habarlaıdy QazAqparat HAA tilshisi.
Oblystyq ІІD baspasóz qyzmetiniń habarlaýynsha, búldirshin men onyń ápkesi óz úılerine qaıtaryldy. Qazir polıtseıler bir táýlik boıy joǵalyp ketken búldirshin men naýqas týysynyń qaıda bolǵanyn anyqtap jatyr.
Eske salaıyq, keshe Shymkent qalasynyń turǵyny polıtsııaǵa aryzdanǵan bolatyn. Onda Marjan Taǵaıbekkyzy esimdi týǵan ápkesi kishkentaı qyzyn alyp, iz-túzsiz joǵalyp ketkenin habarlaǵan. Jedel izdestirý sharalaryn júrgizgen tártip saqshylarynyń áreketi nátıje bermegen bolatyn. Keıin qala turǵyndaryna habarlap, búldirshin men ápkesin kórgen bilgender bolsa polıtsııaǵa aıtýyn suraǵan edi.
