Shymkentte Jer qatynastary basqarmasynyń basshylyǵy para alý kúdigine ilindi

ShYMKENT. QazAqparat – Shymkent qalalyq Jer qatynastary basqarmasynyń basshylyǵy jemqorlyq faktisi boıynsha kúdikke ilindi. Bul týraly Sybaılas jemqorlyqqa qarsy is-qımyl agenttigi Shymkent qalasy boıynsha departamentiniń basshysy Dáýren Erǵarın Facebook-paraqshasynda jazdy, dep habarlaıdy QazAqparat tilshisi.

Shymkent qalasy boıynsha Sybaılas jemqorlyqqa qarsy qyzmeti qalanyń Sáýlet, qala qurylysy jáne jer qatynastary basqarmasynyń basshy quramyna qatysty birqatar qylmystyq isterdi tergep jatyr.

Basqarma basshysy qyzmettik mindetterin oryndaý kezinde qamqorlyq kórsetkeni úshin bólim bastyqtarynan 200 myńnan 800 myń teńgege deıingi mólsherde para aldy degen kúdikke ilingen.

Onyń orynbasary men bólim bastyǵy adamdar tobymen aldyn ala sóz baılaý arqyly kásipkerden 5 mıllıon teńge kóleminde para aldy dep aıyptalyp otyr. Kásipker parany jer ýchaskesin memleket paıdasyna alý kezinde bıýdjetten aqshany kedergisiz tóleý úshin bergen.

«Sot kúdikti tulǵalarǵa qatysty bultartpaý sharalaryn sanktsııalady.

Sotqa deıingi tergeý jalǵasýda. Qylmystyq-protsessýaldyq kodeksiniń 201-babyna sáıkes tergeý múddesine oraı ózge aqparat jarııa etýge jatpaıdy. Sonymen birge, Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsessýaldyq kodeksiniń 19-babynyń 1-bóligine sáıkes, ár adam onyń qylmystyq quqyq buzýshylyq jasaýdaǵy kinási sot úkimi zańdy kúshine enbeıinshe kinásiz dep esepteledi», - dep jazdy Dáýren Erǵarın.