Shymkentte jemis aǵashtary gúldedi

ShYMKENT. QazAqparat – Shymkentte jemis aǵashtary gúldedi. Kóktem kelip, kúnniń jylynýynan órikter gúl ashty, dep habarlaıdy QazAqparat tilshisi.

Sınoptıkter Shymkentte naýryz aıynda kún jyly bolatynyn, tek azdap jańbyr jaýatynyn habarlaǵan bolatyn. Qazir megapolıste aýa temperatýrasy kúndiz +20 +23 gradýsqa deıin kóterilgen. Sonyń áserinen jemis aǵashtary búr jara bastady.

Búginde jemis aǵashtary jaıqalyp, aınalaǵa erekshe áser berip tur. Gúldengen ári jupar ańqyǵan aǵashtardyń mańynan aralardy da kórýge bolady.

Baǵbandar bolsa endigi kezekte alma, shıe aǵashtary gúldeıtinin aıtady. Al, bazbir turǵyndar erte búr jarǵan jemis aǵashtary úshin alańdaýly. Ádette naýryzdyń jıyrmasyna deıin bir sýyq bolatynyn aıtyp, «jemis aǵashtaryn úsik uryp kete me» dep ýaıymdaıdy.

Dese de aýa raıyn boljaýshylar alańdaýǵa negiz joq dep otyr. Sebebi, naýryz aıynyń sońyna deıin shym shaharda qatty sýyq bolmaıtynyn, tek azdap jańbyr jaýatynyn aıtady.