Shymkentte jekemenshik úıden jáne úı aldyndaǵy kólikten 4 adamnyń denesi tabyldy

ShYMKENT. QazAqparat – Shymkentte jeke úıdiń aýlasyndaǵy kólikten eki adamnyń máıiti tabylǵan. Oqıǵa ornyna jetken polıtseıler úıdiń ishinde taǵy bir er adam men áıeldiń múrdesi jatqanyn anyqtaǵan, dep habarlaıdy QazAqparat tilshisi.

Qalalyq polıtsııa departamentiniń málimetinshe, qylmystyq oqıǵa 12 shildede bolǵan. Keshki saǵat 18:20 shamasynda Qarabýra kóshesiniń boıyndaǵy nómirsiz úıdiń aldynda belgisiz bireý «Toyota Corolla» markaly avtokóliginiń ishindegi eki er adamdy atyp óltirgeni anyqtaldy.

Jedel-tergeý tobynyń qyzmetkerleri oqıǵa ornyn tekserý barysynda úıdiń qaqpasynyń aldynda turǵan kólikten 32 jáne 40 jastaǵy eki er adamnyń máıitin tapqan. Olardyń atys qarýynan jaraqat alǵany belgili bolǵan. Tártip saqshylary úıdiń ishin tekserip, 40 jastaǵy erkek pen 28 jastaǵy áıeldiń denesin tapty.

«Oqıǵa ornynda aıǵaqty zat retinde eki atys qarýy, oq-dári jáne qorǵanys quraly tárkilenip alyndy. Atalǵan fakti negizinde QR QK 99 jáne 287-baby boıynsha is qozǵalyp, tıisti saraptamalar taǵaıyndaldy. Kazirgi tańda tergeý organy oqıǵanyń naqty mán-jaıyn anyqtap jatyr. QR QPK 201-babynyń talaptaryna sáıkes tergeý múddesi úshin basqa derekter jarııalanbaıdy» delingen habarlamada.