Shymkentte jedel járdem qyzmetiniń jańa beketteri ashyldy

ShYMKENT. QazAqparat - Shymkentte jedel járdem qyzmetiniń úsh jańa beketi ashyldy. Aqjaıyq, Aıqap móltekaýdandary men Qarabastaý eldimekeninde ótken  saltanatty sharaǵa qalanyń densaýlyq saqtaý basqarmasy basshysy Nurlan Qasymov qatysyp, beketterdiń  jumysymen tanysty,  dep habarlaıdy QazAqparat tilshisi.

Aqjaıyq  shaǵynaýdanynda ashylǵan bekette 10 brıgada 150 myń turǵynǵa medıtsınalyq kómek kórsetedi dep josparlanyp otyr. Munda jumys bólmeleri  zamanaýı qural-jabdyqtarmen jaraqtandyrylǵan. Dıspetcherlik bólme men feldsher kabıneti, dárihana qoımasy men qyzmetkerlerdiń  demalys bólmesi bar. Bekette mamandar ǵalamtor arqyly naýqastyń mekenjaıyn anyqtap, dıagnozymen tanysa alady. Al, ózge eki beket búginnen bastap  9 myń jáne  12 myń turǵynǵa qyzmet kórsetýdi bastady.

Aıta keteıik, turǵyndardyń shaqyrtýlary men shaǵymdardyn saralaǵan mamandar osy úsh  shaǵynaýdanǵa beketterdiń qajettiligin anyqtaǵan. Endi jańadan ashylǵan beketterdiń arqasynda  jedel járdem brıgadalarynyń naýqastarǵa jetý ýaqyty azaıady dep boljanýda. Búginde shaharda 81 brıgada qymet kórsetedi. Alaıda tıisti talaptar boıynsha mıllıonnan asa turǵyny bar qalada 100 brıgada jumys isteýi qajet. Bul rette densaýlyq saqtaý basqarmasynyń basshysy Nurlan Qasymov jedel járdem qyzmetiniń sapasy jaqsartýda túrik kásipkerlerimen memorandým jasalǵanyn atap ótti. Sonyń aıasynda keler  jyly jańadan 100 jedel járdem kóligi jetkizilmek.