Shymkentte jedel járdem qyzmeti tolyqtaı tsıfrlyq júıege kóshti
Qalalyq densaýlyq saqtaý basqarmasynyń málimetinshe, jedel járdem qyzmetin kórsetetin mamandardyń barlyǵy smartfonmen qamtylǵan. Endi shuǵyl járdem qyzmetkerleri qaǵaz toltyrmaıtyn bolady. Brıgadany shaqyrtý kartasyn, ýchaskelik dárigerdiń dabyl qaǵazyn jáne jedel medıtsınalyq járdem stantsııasynyń ilespe paraǵyn smartfonǵa engiziledi. Osynyń arqasynda qyzmetkerler ortalyq stansaǵa kelmeı-aq, qolyndaǵy smartfon arqyly tikeleı shaqyrtýǵa bara alady. Bul mamandardyń ýaqytyn únemdep, qaǵazbastylyqtan arylýǵa kómóktesedi, deıdi salaǵa jaýaptylar.
«Elbasynyń Qazaqstan halqyna Joldaýynda berilgen tapsyrmalardyń biri 2019 jyldyń 1 qańtarynan bastap medıtsına salasy qaǵazsyz qujat aınalymyna kóshýi bolatyn. Sondaı-aq, «Aqparattyq júıelerdi biriktirý, mobıldik tsıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medıtsınalyq kómektiń qoljetimdiligi men tıimdiligin arttyrý qajet» dep densaýlyq saqtaý salasynyń mamandaryna mindet júktegen edi. Osy tapsyrmany basty nazarǵa ala otyryp, Shymkent qalasynyń jedel járdem stansasy alǵashqylardyń biri bolyp qaǵazsyz jumys jasaýǵa kóshti», - Shymkent qalasynyń Densaýlyq saqtaý basqarmasynyń basshysy Nurlan Qasymov.
Aıta keteıik, 1 mıllıonnan astam halqy bar qalada 81 jedel járdem brıgadasy qyzmet kórsetedi. Kúnine qala boıynsha ortasha eseppen 15 -16 myń shaqyrtý túsedi. Ortalyqqa kelip túsken qońyraýlardyń 20 paıyzy 4-sanattaǵy shaqyrtý bolǵandyqtan, meken-jaıy boıynsha emhanalarǵa tikeleı joldanady. Sondaı-aq, jedel járdem stansasynda call ortalyq jumys isteıdi. Osynyń arqasynda jedel járdem kóliginiń qaı mańda júrgenin, dittegen jerine neshe mınýtta jetkenin baqylaýǵa bolady.