Shymkentte jedel járdem kóligimen apatqa túsken dárigerdiń jaǵdaıy qalypty

ShYMKENT. QazAqparat - Shymkentte jedel járdem kóligimen apatqa túsken dárigerdiń jaǵdaıy qalypty. Bul týraly qalalyq densaýlyq saqtaý basqarmasynyń baspasóz qyzmetinen málim etti, dep habarlaıdy QazAqparat tilshisi.

Shymkentte «NISSAN TIIDA» markaly avtokólik jedel járdem kóligine soqtyǵysyp, saldarynan 4 adam zardap shekken edi. Oqıǵa Jańaqurylys jáne Baıshubar kósheleriniń qıylysynda bolǵan. Jedel járdem kóliginiń júrgizýshisi men eki jolaýshysy túrli dene jaraqattarymen aýrýhanaǵa tústi. Eki adam dárigerler qaraǵannan keıin úılerine qaıtarylsa, 33 jastaǵy dáriger aýrýhananyń jansaqtaý bólimine jatqyzyldy.

Mamandardyń aıtýynsha, basynan soqqy alǵan dárigerdiń qazirgi jaǵdaıy qalypty.

Aıta keteıik, atalǵan fakti boıynsha QR Qylmystyq kodeksiniń 345-babymen sotqa deıingi tergep-tekserý amaldary júrgizilip jatyr.