Shymkentte jedel járdem dárigerleri 15 kúndik náresteni aman alyp qaldy
Qalalyq jedel járdem qyzmetiniń málimetinshe, túngi saǵat 00:59 shamasynda náresteniń aýyr haline baılanysty shaqyrtý kelip túsken. Arnaıy brıgada mamandary 12 mınýttan keıin jetip, birden teksergen. Dárigerler kishkentaı aýqastyń es-túzsiz jatqanyn, tipti tynys almaı jatqanyn anyqtaǵan. Náreste klınıkalyq ólim jaǵdaıynda bolǵan.
Dáriger men feldsher dereý reanımatsııalyq is-sharalardy júrgizip, em jasaǵan. Nátıjesinde 2 mınýttan keıin naýqas esin jınap, tynys alýy jáne pýlsi qalpyna keltirilgen. Júrek soǵysy da rettelgen. Jedel járdem qyzmetkerler alǵashqy medıtsınalyq kómek kórsetkennen keıin Shymkent qalalyq klınıkalyq balalar aýrýhanasyna jatqyzyldy.
Dál osyndaı jaǵdaı basqa taǵy bir 15 kúndik nárestemen oryn alǵan. Arnaıy brıgada kishkentaı naýqasqa 9 mınýttan keıin kelip anyqtasa, sábıdiń tynys ala almaı qalǵany belgili bolǵan. Emizý kezinde anasy balanyń aýyzynan jáne murynynan emshek sútiniń aǵyp ketýine jáne tynys almaıtyndyǵyna nazar aýdarǵan.
Dárigerler kelgen kezde naýqastyń jaǵdaıy aýyr bolyp, klınıkalyq ólim anyqtalǵan. Reanımatsııalyq sharalar júrgizgennen 3 mınýttan keıin balada júrek yrǵaǵy, tynys alý jáne pýls qalpyna keltirilgen. Alǵashqy kómek kórsetilgennen keıin náreste № 2 oblystyq perınataldyq ortalyqqa em qabyldaýǵa jatqyzylǵan.
