Shymkentte jaıaý adamdy qaqqan avtobýs júrgizýshisine qatysty qylmystyq is qozǵaldy
ShYMKENT. QazAqparat - Shymkentte jaıaý adamdy qaqqan avtobýs júrgizýshisine qatysty qylmystyq is qozǵaldy. Avtobýs aıypturaqqa jetkizilip, anyqtaý sharalary júrgizilýde, dep habarlaıdy QazAqparat HAA tilshisi.
Aıta keteıik, jol kólik oqıǵasy demalys kúni Teriskeı móltek aýdanynda bolǵan. Qoǵamdyq kólik júrgizýshisi baǵdarshamnyń qyzyl túsi janyp qalǵanyna qaramastan ótip ketpekshi bolǵan. Alaıda bul kezde jaıaý júrginshiler jolǵa shyǵyp ketken. Saldarynan avtobýs jaıaý adamdy qaǵyp ketti. Bul oqıǵa kóshedegi beıne baqylaý kamerasyna da túsip qalypty. Oqıǵa ornyna kelgen polıtseıler 34 jastaǵy avtobýs júrgizýshisiniń jol júrý erejesin buzǵanyn anyqtaǵan. Al, túrli dene jaraqatyn alǵan 18 jastaǵy jábirlenýshi oblystyq aýrýhananyń jansaqtaý bólimine jetkizildi. Dárigerler onyń jaǵdaıyn aýyr dep baǵalaýda.
Qazir kináli júrgizýshiniń ústinen Qylmystyq Kodekstiń 345-shi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» babymen qylmystyq is qozǵaldy. Sot-medıtsınalyq saraptamalar taǵaıyndalyp, tergeý amaldary júrgizilip jatyr.
