Shymkentte jasóspirimderge qatysty 1,4 myńǵa jýyq quqyq buzýshylyq anyqtaldy
ShYMKENT. QazAqparat - Shymkentte jyl basynan beri jasóspirimderdiń qatysýymen 1,4 myńǵa jýyq ákimshilik quqyq buzýshylyq anyqtaldy, dep habarlaıdy QazAqparat.
Shymkent qalalyq polıtsııa departamenti qyzmetkerleri atqarǵan is-sharalar nátıjesinde, osy jyldyń 6 aıynda kámelet jasyna tolmaǵandarǵa qatysty 1392 ákimshilik quqyq buzýshylyq belgili boldy.
«Onyń ishinde, 32 jasóspirim oıyn-saýyq mekemesinde bolǵan, 897 bala 23:00-den keıin zańdy ókilinsiz turǵyn jaıdan tys jerlerde júrgen. ÁQBtK-tiń 442-babynyń 1-bóligi (Kámeletke tolmaǵandardyń túngi ýaqytta zańdy ókilderiniń erip júrýinsiz saǵat 22:00-den tańǵy 6-ǵa deıin oıyn-saýyq mekemelerinde bolýy) boıynsha 29 ata-anaǵa ákimshilik shara qoldanyldy. Sondaı-aq, mekeme ıelerine ÁQBtK-tiń 132-babymen 20 hattama toltyryldy», - dep málimdedi vedomstvodan.
Aıta keteıik, quqyq buzýshylyq jasaǵany úshin 6 jasóspirim jáne ata-analyq mindetterin durys oryndamaǵany úshin 4 jaısyz otbasy esepke alyndy. Qazirgi tańda bul baǵyttaǵy jedel-profılaktıkalyq sharalar jalǵasyn tabýda.
