Shymkentte jasóspirim qaraýsyz qalǵan shuńqyrdaǵy sýǵa batyp ketti

ShYMKENT. QazAqparat - Shymkentte jasóspirim qaraýsyz qalǵan karer shuńqyryndaǵy sýǵa batyp, qaıtys boldy. Onyń máıitin jedel-qutqarý jasaǵynyń qutqarýshy-súńgýirleri shyǵaryp aldy, dep habarlaıdy QazAqparat tilshisi.

Oblystyq TJD baspasóz qyzmetiniń málimetinshe, qaıǵyly jaǵdaı keshe, 2 mamyr kúni saǵat 14:45 shamasynda bolǵan. «Qaıtpas-1» shaǵynaýdanynda 15 jastaǵy bala sýǵa shomylýǵa jabdyqtalmaǵan shuńqyrǵa túsken. Atap aıtqanda, qaraýsyz qalǵan karerlik qazanshuńqyrda jerasty sýlary kóterilgen tustary paıda bolǵan. Artynsha bala belgisiz jaǵdaıda sýǵa qulap, batyp ketken. Oqıǵa ornyna Shymkent qalasy TJD 5 qyzmetkeri, jedel-qutqarý jasaǵynyń 4 qutqarýshy-súńgýirleri, 1 tehnıka, 1 júzý quraly tartylǵan.

«Jedel-qutqarý jasaǵynyń qutqarýshy-súńgýirleri oqıǵa ornyna kelip, sý astynda izdestirý jumystaryn júrgizdi. Nátıjesinde kúndizgi saǵat 16:20 kezinde sýǵa batyp ketken jasóspirimniń máıitin tapty. Qazirgi tańda qaıǵyly oqıǵanyń sebebi naqtylanýda. Qarataý aýdanynyń polıtsııasy sot-medıtsınalyq saraptama taǵaıyndap, anyqtaý jumystaryn júrgizip jatyr» delingen habarlamada.