Shymkentte jasandy tynys berý apparattary shyǵaryla bastady
«Qazmedprıbor» búginnen bastap ÓJJ apparattaryn shyǵarýdy bastady. Kásiporyn táýligine 20-25 qurylǵy shyǵarýǵa qaýqarly», – dep atap ótti qala ákimi.
Qala ákimdigi aýrýhanalarǵa alǵashqy 88 ÓJJ apparatyn jetkizýge tapsyrys bergen bolatyn. Kásiporynnan monıtorlar, dıspenserler, ımpýlstik oksımetrler, analızatorlar – barlyǵy 32 medıtsınalyq qural-jabdyqtar túrin satyp alady.
Qala ákimi shilde aıynda atalǵan kásiporyn basshylarymen kezdesýde otandyq ÓJJ apparatyn shyǵarýdy bastaıtynyn aıtqan edi. Úsh aı boıy osy baǵytta jumystar atqaryldy.
«Ózderińiz bilesizder, koronavırýs aýrýy qatty órshigen kezde qalaǵa jeldetkish apparattary qajet boldy. Biz Kazmedpribor kompanııasymen osyndaı qurylǵylardy shyǵarý múmkindigin talqyladyq, nátıjesi mine. Ónimder sertıfıkattaýdan ótti, kásiporyn jeldetkishter shyǵarýdy bastady. Aptanyń aıaǵyna deıin alǵashqy 88 ÓJJ apparaty jergilikti aýrýhanalarǵa jetkiziledi. Jaqyn arada aýrýhanalar men emhanalar Shymkentte shyǵarylǵan jabdyqtarmen qamtamasyz etiledi», – dedi qala ákimi.
Murat Dúısenbekulynyń aıtýynsha, Shymkentte epıdemıologııalyq jaǵdaı turaqty. Infektsııa oshaqtary jáne baılanysta bolǵan adamdar ambýlatorlyq baqylaýǵa alynady. Sondaı-aq, bıyl qalanyń medıtsınalyq mekemelerin materıaldyq-tehnıkalyq jabdyqtaýǵa 6,6 mlrd teńge qarastyrylǵanyn aıtty. Ótken jylmen salystyrǵanda bul qarjy alty ese kóp.
Kazmedpribor – koronavırýspen kúresý úshin qajetti medıtsınalyq tehnıka shyǵaratyn birden-bir kásiporyn. Kásiporyn 50 myń dana medıtsınalyq jabdyq, 150 myń dana medıtsınalyq jıhaz, 1000 avtomobıl óndirýge qaýqarly.
Aıta ketsek, atalǵan kásiporyn Germanııa, Japonııa, Koreıa kompanııalarymen birlesip, 300-den astam medıtsınalyq buıymdar shyǵarady. Ónimniń negizgi túrleri: medıtsınalyq mashınalar; patsıentterge arnalǵan monıtorlar; EKG apparaty; fýnktsıonaldy kereýetter jáne ózge de jabdyqtar.