Shymkentte jas mýzykanttardyń «Shabyt sherýine» 10 myń adam qatysty
Dástúrli túrde uıymdastyrylyp kele jatqan sharaǵa bıyl áleýmettik jaǵdaıy tómen otbasynda tárbıelenip jatqan mektep oqýshylary men kolledj stýdentteri qatysty, dep habarlaıdy QazAqparat tilshisi.
Qalanyń ortalyq Ál-Farabı alańynan bastalǵan «Shabyt sherýinde» jasóspirimder sap túzep turdy. Tórt bloktan turatyn sherýdi qalalyq mektepten tys mekemelerdiń ónerpazdary - Oqýshylar saraıynyń barabanshylar toby men №2 balalar saz mektebiniń dombyrashylar ansamblderi bastap júrdi.
Olardyń izderinen Saz kolledjiniń úrmeli jáne ult aspaptar orkestri men Óner mektebiniń bı ujymdary, №1 balalar saz mektebiniń hor ujymy erdi. Ekinshi blokty №3 estetıkalyq-saz mektebiniń «Dombyra» klasynyń oqýshylary men №4 saz mektebiniń ózbek ulttyq aspaptary orkestri bastasa, artynan kórkemsýret mektebiniń jas sýretshileri men jastardyń ýaqytyn tıimdi uıymdastyrý ortalyǵynyń jas sportshylary jáne Ekologııa ortalyǵynyń úıirme ókilderi sap túzedi. Kelesi blokty qalanyń 131 mektebiniń jas ónerpazdarynan qurylǵan sherý jalǵastyrdy. Sońǵy blokta kolledj stýdentteri júrip ótip, oǵan Óner jáne dızaın kolledji, №2 Indýstrıaldy-qurylys kolledji, №3 ındýstrıaldy-tehnıkalyq kolledji, №4 kolledj, №5 Jeńil ónerkásip jáne servıs kolledji, Agrarlyq kolledj, Polıtehnıkalyq kolledji jáne Jol-kólik kolledjiniń stýdentteri óz mamandyqtaryna saı kıim úlgisimen shyǵyp, sherýdi qorytyndylady.
Ár bilim oshaǵynyń balalary men jastary sherýde júrip ótken kezde sol mekemeniń jetistikteri týraly aıtyldy. Sondaı-aq, bul kúni barabanshylar toby men úrmeli aspaptar orkestri, ansamblder men majoretkalar, cherlıderler men hor jáne bı ujymdary júrip ótti. Qyzyqty repertýar men mýzykalyq aspaptardyń ártúrliligi, shyǵarmalardyń túpnusqalyǵy men birneshe túrdegi mýzykalyq qyzmettiń birigýi - sazdy-teatrlandyrylǵan sherý merekeni nurlandyra tústi. Sherý sońy merekelik kontserttik baǵdarlamaǵa ulasty.
Osylaısha Respýblıka dańǵylynan bastalǵan sherý B.Momyshuly kóshesi men Ál-Farabı alańy arqyly Aıbergenov kóshesine deıin jalǵasty.
Aıta keteıik, atalǵan sherý «Bolashaqqa baǵdar: Rýhanı jańǵyrý» baǵdarlamasyn júzege asyrý men rýhanı-adamgershilikti, estetıkalyq jáne patrıottyq tárbıe berý maqsatynda uıymdastyryldy. Úshinshi sherý bıyl barlyq óńirlerde, sonyń ishinde Shymkent qalasynda da jalǵasyn tapty.