Shymkentte jarylystan keıin perzenthanadaǵy 100-den astam adam basqa ǵımaratqa kóshirildi

ShYMKENT. QazAqparat - Shymkentte jarylys bolǵan ǵımarattyń janyndaǵy perzenthanadan 100-den astam ana men sábı, medıtsına qyzmetkerleri basqa ǵımaratqa kóshirildi. Bul týraly qalalyq TJD bastyǵy Madııar Jaqsybaev málimdedi, dep habarlaıdy QazAqparat tilshisi.

«Perınataldyq ortalyqtan evakýatsııalanǵan júzden asa ana men sábıleri Rashıdov kóshesindegi perzenthanaǵa tasymaldanyp, ornalastyryldy. Jarylys bolǵan ǵımarattyń qasyndaǵy bes qabatty turǵyn úıdiń 20-ǵa jýyq turǵyny da qaýipsiz jerge kóshirildi. Olardyń arasynda zardap shekken adamdar joq. Dese de, oqıǵa ornynda jedel qutqarý jasaǵy men kınologtar jumys istep jatyr. Qalalyq ákimdikte shtab qurylyp, arnaıy tehnıkalarmen tazalaý jumystaryn júrgizý sharalary bastalady», - dedi Madııar Jaqsybaev.

Departament bastyǵynyń sózinshe, jarylys saldarynan eki qabatty ǵımarattyń 55 sharshy metri órtenip, 130 sharshy metri qulaǵan. Al, oqıǵa orynan tabylǵan er adam 1979 jyly týǵan perzenthananyń kúzetshisi ekeni anyqtaldy. Órtengen ǵımarattyń perınataldyq ortalyqqa esh qatysy joq bolyp shyqty.

«Jarylys bolǵan ǵımarattyń ıesi ishte jumysshylar bolmaǵanyn aıtady. Bári demalysta bolǵan. Sonymen qatar, ǵımaratta eki tonnadaı sýtegi asqyn totyǵy saqtalǵanyn jetkizdi. Bul - fýratsıllın men glıýkoza shyǵaratyn suıyqtyq. Jarylysqa osy suıyqtyq sebep bolýy múmkin degen boljam bar. Dese de, onyń naqtysy tekserý barysynda anyqtalady. Gazdyń kesirinen jarylys bolýy múmkin degen boljam qarastyrylyp jatqan joq», - dedi qalalyq TJD bastyǵy.

Eńbekshi aýdandyq polıtsııa bólimi QR QK 292-baby 2-bóligi «Adam ólimine ákep soqqan órt qaýipsizdigi talaptaryn buzý» boıynsha sotqa deıingi tergeýdi bastady. Bul rette 2 jyldan 7 jylǵa deıin bas bostandyǵynan aıyrý jazasy qarastyrylǵan.

Buǵan deıin habarlaǵanymyzdaı, Shymkentte dári saqtaıtyn ǵımaratta jarylys bolyp, kúzetshi qaza tapty.