Shymkentte jarylys bolǵan gaz quıý beketiniń basshysy men ınjeneri sottaldy

ŞYMKENT. QazAqparat - Shymkentte gaz jarylyp bir jumysshy qaza tapqan janarmaı stansasynyń basshysy men ınjeneri sottaldy. Qarataý aýdandyq sotynyń úkimimen eki aıyptalýshy kináli dep tanylyp, olardyń 2 jyl 6 aıǵa jáne 3 jylǵa bas bostandyǵy shekteldi, dep habarlaıdy QazAqparat tilshisi.

Qylmystyq is alty aı tergelip, sot protsesi eki aı kóleminde qaralǵan. Aıyptalýshy retinde gaz quıý beketiniń basshysy men onyń órt qaýipsizdigine jaýapty ınjener-mamany tanyldy.

«Sot Murat Ótegenov QR QK-nyń 292-baby 2-bóliginde kórsetilgen qylmystyq quqyq buzýshylyq jasaǵyn úshin kináli dep tanylsyn. 3 jyl merzimge qaýipti óndiristik merzimge laýazymdy qyzmet etýge quqyǵynan aıyra otyryp, 3 jyl merzimge bas bostandyǵyn shekteý jazasy taǵaıyndalsyn. Jıenbek Qalaýbaev QR QK-niń 292-baby 2-bóliginde kórsetilgen qylmystyq quqyq buzýshylyqty jasaǵany úshin kináli dep tanylsyn. Eki jyl merzimge qaýipti óndiristik mekemede qyzmetpen aınalysý quqyǵynan aıyra otyra, eki jyl alty aı bas bostandyǵynan shekteý jazasy taǵaıyndalsyn», dedi úkim oqyǵan sot tóraǵasy Ermahan Rahmanberdi.

Sýdıanyń sózinshe, gaz saqtaıtyn qoımada órt qaýipsizdigi talaptary saqtalmaǵan. Gaz quıý kezinde eki adamnyń jumysyn bir ǵana adam atqarǵan jáne ol arnaıy kıim kımegen. Jarylys kezinde 20 jastaǵy jumysshynyń denesiniń 98 paıyzyn kúıik shalyp, ol aýrýhanada qaıtys bolǵan. Soǵan qaramastan marqumnyń ákesi aıyptalýshylarǵa eshqandaı talap-aryzy joq ekenin alǵa tartyp, keshirim bergen.

Degenmen, qorǵaýshylar sýdıanyń sheshimine kelispeı otyr. Qalalyq sottyń appelıatsııalyq alqasyna úkimdi qaıta qaraý jóninde aryz túsirmek.

Eske salaıyq, oqys oqıǵa ótken jyly jazda Tassaı shaǵyn aýdanynda bolǵan edi. Gaz saqtaý qoımasy jarylyp, 20 jastaǵy jumysshy qaıtys bolǵan.