Shymkentte jaryq berýshi kompanııa elektr qýatynyń tarıfin negizsiz kótergen
Shymkent qalalyq prokýratýrasynyń málimetinshe, qadaǵalaý organy ókilderimen 2015-2017 jyldar aralyǵynda «Ońtústik Jaryq Tranzıt» JShS-niń qyzmetindegi elektr energııasyna tarıfti bekitý jáne qoldaný zańdylyǵyna keshendi tekserýler júrgizilgen. Tekserý barysynda tabıǵı monopolııalar sýbektisi tarıfterdi qalyptasyrý kezinde jáne paıdalaný barysynda túrli zańbuzýshylyqtarǵa jol berilgendigi belgili boldy.
«2016-2017 jyldar aralyǵynda 15,8 mln. teńge mólsherde tarıftik smetalarǵa qosylǵan áleýmettik salyq pen áleýmettik jarnalar boıynsha shyǵyndaryn 5% artyq oryndamaý, sondaı-aq 6,8 mln. teńge mólsherde jumysshylardyń medıtsınalyq baıqaýdan ótý qyzmetin tarıftik smetaǵa negizsiz qosý arqyly elektr qýatyna tarıfti kóterý derekteri anyqtaldy. Sonymen qatar satyp alý barysynda zań talaptaryn saqtamaý jáne 13,3 mln. teńge mólsherde mindetti salyqtardy tolyq eseptemeý (KTS jáne QQS) derekterine jol berilgen» delingen prokýratýra habarlamasynda.
Budan bólek, qala prokýratýrasy engizgen qadaǵalaý aktileri boıynsha tabıǵı monopolııalar sýbektileri tarapynan 22,6 mln. teńgege kompensatsııalyq tarıf engizildi. Sondaı-aq, zańbuzýshylyqtarǵa jol bergeni úshin mekeme QR ÁQBtK-niń 164-babynyń 4-bóligimen (tabıǵı monopolııa sýbektisiniń shekteýlerdi saqtamaýy, sol sııaqty tabıǵı monopolııa sýbektisiniń Qazaqstan Respýblıkasynyń tabıǵı monopolııalar týraly zańnamasynda belgilengen mindetterdi oryndamaýy nemese tıisinshe oryndamaýy) jaýapkershilikke tartylyp, 2 mln teńge aıyppul salynǵan.
Al, salyq organyna joldanǵan usynysty qaraý nátıjesinde, mekeme QR ÁQBtK-niń 278-babynyń 1-tarmaǵymen (salyqtardyń jáne bıýdjetke tólenetin basqa da mindetti tólemderdiń somalaryn kemitip kórsetý) ákimshilik jaýapkershilikke tartylyp, 6 mln. teńge mólsherde aıyppul tóleýge mindetteldi. Prokýratýra qyzmetkerleri jaryq berýshi kompanııanyń memleket aldyndaǵy qaryzdaryn tolyq ótegendigin habarlady.