Shymkentte jappaı tártipsizdik jasady degen kúdikpen 400-den asa adam ustaldy
Olardyń ishinde 155-ne ákimshilik, 50-ne qylmystyq is qozǵaldy -dep habarlaıdy QazAqparat tilshisi. Jappaı tártipsizdik uıymdastyrýshylardyń 40-50 paıyzy shymkenttikter bolsa, qalǵany respýblıkamyzdyń ózge óńirlerinen kelgeni anyqtaldy.
«Beıbit sherýden bastalyp buzaqylyqqa jalǵasqan kóteriliste 17 tártip saqshysy túrli deńgeıde jaraqat aldy, tórteýiniń jaǵdaıy aýyr, qaza bolǵandar joq. Odan bólek 57 polıtsııa avtokóligi tolyǵymen jandy. Mádenı nysandar men shaǵyn bızneske keltirilgen shyǵyn kólemi anyqtalýda. 10 kúnde belgili bolyp, Úkimette qurylǵan arnaıy komıssııaǵa usynamyz»,-dedi qala ákimi Murat Áıtenov. Qala ákiminiń aıtýynsha, ótken jyly qalaǵa qoıylǵan beınekameralar buzaqylardy ustaýǵa úlken kómegin tıgizgen. Zamanaýı kameralar olardyń túr-tulǵasyn anyqtap bergen. 6 qańtar kúni Shymkent qalypty tirshiligin bastady.
Qala ákiminiń basqarýyndaǵy jedel shtab kúsheıtilgen tártipte jumys jasaýda. Antıterrorlyq is-sharalar áli de jalǵasyp jatqandyqtan, turǵyndardyń tótenshe jaǵdaı rejıminde keshki saǵat 23.00-den tańǵy 7.00-ge deıin tártip saqtaýy kerek.
