Shymkentte janyp jatqan páterdegi balalar órt sóndirýshilerdi ózderi shaqyrdy
ShYMKENT. QazAqparat - Shymkentte páterlerdiń biri órtenip, úıde bolǵan balalar órt sóndirýshilerdi shaqyrǵan, dep habarlaıdy QazAqparat HAA tilshisi.
Oqys oqıǵa Ǵanı Ilıaev kóshesindegi kópqabatty úılerdiń birinde oryn alǵan. Úıdiń tórtinshi qabatyndaǵy páterden ózderi shyǵa almaıtynyn bilgen 8 jáne 10 jastaǵy jetkinshekter órt sóndirý qyzmetine habarlasyp, kómek surapty. Oqıǵa ornyna jeke quramnyń 18 qyzmetkeri men 4 tehnıkasy, sonymen qatar medıtsınalyq ortalyǵynyń qyzmetkerleri jetti. Sóndirýshiler kelgende úıdiń terezelerinen qoıý qara tútin shyǵyp turǵan. Turyǵn úıdiń kireberisi tolyǵymen tútinge oranǵan. Al, ata-anasyz páterde qalǵan eki balaǵa qaýip tónipti. Tótenshe jaǵdaılar qyzmetkerleri jedel túrde gaz-tútinnen qorǵaý býynyn quryp, satymen pátergen kóterilgen. Shymkent qalasyndaǵy №3 órt sóndirý bóliminiń qaraýyl bastyǵy azamattyq qorǵaý aǵa leıtenanty S.Ábdihanov, bólimshe komandıri azamattyq qorǵaý aǵa serjanty Q.Dúısenov jáne órt sóndirýshi azamattyq qorǵaý serjanty E.Nurǵalıev tórtinshi qabatqa shyǵyp, páterdiń esigin buzyp kiredi. Qutqarýshylar der kezinde tútinge oranǵan úıden balalardy shyǵaryp, jedel-járdem qyzmetkerlerine tapsyrdy. Artynsha tilsiz jaý aýyzdyqtalyp, jalpy kólemi 70 sh.m. quraıtyn bólmedegi jalyn tolyǵymen sóndirildi. Qazir óńirdiń TJD qyzmetkerleri órttiń shyǵý sebepteri men shyǵyn kólemin anyqtaýda.
