Shymkentte jańǵyrtýdan ótken gaz taratýshy jeliler paıdalanýǵa berildi
ShYMKENT. QazAqparat - Búgin Ońtústik Qazaqstan oblysynyń ortalyǵy - Shymkentte gaz taratýshy jelilerdi qaıta jóndeý men jańǵyrtýdyń kezekti satysy aıaqtalyp, el ıgiligine berildi, dep habarlaıdy oblys ákimdiginiń baspasóz qyzmeti.
Sharaǵa oblys ákimi Janseıit Túımebaev, «QazTransGazAımaq» AQ bas dırektorynyń orynbasary Ǵalym Aıdosov, bıznes qurylymdar men BAQ ókilderi qatysty.
Kezdesýde sóz bastaǵan oblys ákimi J.Túımebaev aımaqtaǵy kógildir otynmen qamtamasyz etý jumystary jaıyna toqtalyp, osy baǵyttaǵy ıgi isterdiń jalǵasyn tabýyna tilektestik bildirdi.
«QazTransGazAımaq» aktsıonerlik qoǵamy qazirgi tańǵa oblystaǵy 300 myńǵa jýyq abonentti gazben qamtý qyzmetin júrgizip otyr. Atalǵan mekeme ujymymen kógildir otynmen qamtýdaǵy Keńes úkimeti kezinde salynyp, tozyǵy jetken qubyrlardy, qondyrǵylardy jańartý arqyly halyqqa sapaly gaz berý maqsatynda sońǵy 6 jylda 33 mlrd. teńge ınvestıtsııalyq qarjyǵa «Shymkent qalasynyń gaz taratý jelilerin qaıta qurý men jańǵyrtý» baǵdarlamasy júzege asyryldy. Jalpy ınvestıtsııalyq qarajattar esebinen 2390 shaqyrym gaz qubyrlary jańartylǵan. Nátıjesinde 2017 jyldyń 1 qańtaryna qubyrlardyń tozyǵy jetýi 2010 jyldyń tıisti kezeńimen salystyrǵanda 60 %-dan 19 %-ǵa tómendetilip otyr», - dedi Janseıit Qanseıituly.
Munan bólek, aımaq basshysy 2013 jyly Túrkistan qalasyna №15 avtomatty gaz taratý stansasynyń (ári qaraı AGTS), 2015 jyly Báıdibek, Sozaq aýdandaryn gazdandyrýǵa №18 «Shaldar» AGTS qurylysynyń aktsıonerlik qoǵam qarajaty esebinen aıaqtalyp iske qosylǵanyn aıtty. Nátıjesinde, búgingi tańda Túrkistan shahary men Shaıan eldi mekenderi gazben qamtylyp jatyr, dedi oblys ákimi.
2009-2016 jyldar aralyǵynda bıýdjet esebinen eldi mekenderdi gazdandyrý salasyna 65 mlrd. teńge qarajat jumsalyp, 203 eldi mekenge kógildir otyn jetti. Nátıjesinde, 2016 jyldyń qorytyndysymen qosymsha 25 eldi meken gazǵa qosylyp, oblys boıynsha jalpy 300 eldi meken (35,5%) nemese 1 755 306 halyq (61,8%) tabıǵı otynmen qamtylǵaly otyr.
Barshaǵa belgili, oblysymyzǵa «Beıneý-Bozaı-Aqbulaq» otandyq magıstraldy gaz qubyry tartylǵan bolatyn. Búgingi tańda atalǵan qubyrdyń boıyndaǵy oblystyń soltústik-batys bóligindegi 8 aýdandaǵy 248 eldi mekendi (684 304 halyq) gazdandyrý maqsatynda josparlanǵan 7 avtomatty gaz taratý stansalarynyń (AGTS) 4-ýi iske qosyldy. Qalǵan 3 AGTS qurylysyn 2017 jyldyń 1-shi jartyjyldyǵyna aıaqtaý josparlanyp otyr. Osyǵan oraı, oblysty gazdandyrýdyń 2021 jylǵa deıingi is-sharasy ázirlenip, búgingi tańda 47 eldi mekendi gazdandyrýdyń jobalyq-smetalyq qujattamalaryn ázirleý bastaldy. Odan bólek 2017 jyly da bul jumystarǵa qarjy qaraý josparlanýda.
Jalpy oblys eldi mekenderin gazdandyrýdyń is-shara josparyna sáıkes, 2017-2020 jyldar aralyǵynda 383 eldi mekenderdi (733 630 halyq) gazdandyrý josparlanǵan. Nátıjesinde 2020 jyldyń aıaǵyna 683 eldi mekendi (80,9 % e.m.) nemese 2,5 mln. halyqty (89 %) gazdandyrý kózdelip otyr.
Ulttyq operator «QazTransGazAımaq» AQ mamandarymen 2009 jyldan beri bastalǵan tıisti jumystar úzdiksiz gaz jetkizýdi qamtamasyz etý, gaz ysyrabyn azaıtý, júıeniń ótkizý múmkindigin arttyrý maqsatynda qolǵa alynǵan. Onyń ishinde, Ońtústik Qazaqstan oblysyn gazben jabdyqtaýdyń tehnıkalyq bazasyn jaqsartýǵa basymdyq beriledi. Bul, óz kezeginde, jańa gaz ınfraqurylymyn jasap qana qoımaı, tutynýshylar men jetkizýshiler arasynda senimdi baılanys ornatyp, qalyptastyrýǵa múmkindik beredi.
