Shymkentte jáne Aqtóbe oblysynda balabaqsha esepshileri aqsha jymqyrǵan

ASTANA. QazAqparat – Shymkentte jáne Aqtóbe oblysynda balabaqshanyń bas esepshileri ózine jáne mekemede jumys istemeıtin týystaryna aqsha aýdaryp kelgen. Bul týraly Qarjy mınıstrligi ishki memlekettik aýdıt komıtetiniń tóraǵasy Erjan Myńjasarov málim etti, dep habarlaıdy QazAqparat tilshisi.

«Bıyl jyl basynan beri bizdiń komıtetke túrli sala boıynsha 30 myńǵa deıin ótinish kelip tústi. Onyń ishinde 22 myńnan astam ótinish memlekettik satyp alý rásimine qatysty. Sol sııaqty 5 myńnan astam jeke tulǵa ótinish qaldyrdy. Odan bólek, 100-den astam ujymdyq ótinish boldy. Ótinishterdiń deni áleýmettik, qurylys, bilim berý, kólik jáne medıtsına salasy boıynsha bıýdjet qarjysyn jumsaý máselesine qatysty», - dedi Erjan Myńjasarov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, komıtetke kelip túsken ótinishterdiń kóbine tıisti jaýap berildi.

«Mysal keltirsem, Shymkent qalasy men Aqtóbe oblysyndaǵy balabaqshanyń bas býhgalterleri aqshany qolma-qol alý maqsatynda 19 mln teńgeni óz atyna jáne balabaqshada jumys istemeıtin týystaryna negizsiz aýdarǵan faktisi anyqtaldy. Qabyldanǵan shara nátıjesinde atalǵan somanyń 5 mln teńgesi óteldi. Al, aýdıt materıaly ekonomıkalyq tergeý departamentine jiberildi», - deıdi ol.