Shymkentte janarmaı tasıtyn kólik aýdarylyp, 500 lıtr dızel tógildi

ShYMKENT. QazAqparat - Shymkentte janar-jaǵar maı tasıtyn júk kóliginiń júrgizýshisi rýlge ıe bola almaı qalyp, jol ortasynda aýdarylyp qaldy. Saldarynan 500 lıtr dızel otyny jol boıyna tógildi, dep habarlaıdy QazAqparat tilshisi.

Qalalyq Tótenshe jaǵdaılar departamenti baspasóz qyzmetiniń málimetinshe, jol kólik oqıǵasy Eńbekshi aýdanynyń 264 oramynda bolǵan. Bul týraly habarlama saǵat 15.55-te kelip túsken. Aldyn ala málimet boıynsha, júk kóligi «KAZ Oil Trading» JShS-ǵa tıesili.

«Oqıǵa ornynda órttiń aldyn alý úshin jedel sharalar qabyldandy. Oǵan órt sóndirý qyzmetiniń 13 qyzmetkeri men 3 tehnıkasy jumyldyryldy. Sondaı-aq, «Órt sóndirýshi«AQ-nyń 9 qyzmetkeri men 2 tehnıkasy kómekke jetti. Qaza bolǵandar men zardap shekkender joq. Oqıǵanyń sebepteri anyqtalýda», - delingen habarlamada.