Shymkentte janarmaı quıý beketinen dızel urlaǵan er adamnyń áreketi vıdeoǵa túsip qaldy
Janarmaı quıý beketiniń qorshaýynan kanıstr kóterip ótip bara jatqan er adamdy polıtseıler beınebaqylaý kameralarynan baıqap qalǵan. Oqıǵa ornyna birden jedel basqarý ortalyǵynyń kezekshi ınspektorlary men Abaı aýdandyq polıtsııa bóliminiń jedel-tergeý toby jiberildi.
Jaqyndap kele jatqan polıtsııa kóligin kórgen kúdikti dızel otynynyń kanıstrlerin shópke tyǵyp qoıǵan. Sodan kóliginiń kapotyn ashyp, ony jóndep jatqandaı keıip tanytypty.
«Kúdikti polıtsııa basqarmasyna jetkizildi. Sol janarmaı quıý beketinde gaz quıýshy bolyp jumys isteıtin er adamda qoımanyń da kilti bolǵan. Urlyq jaıtyn Abaı aýdandyq polıtsııa bóliminiń anyqtaýshylary tergep jatyr. Jaqynda qylmystyq is sotqa jiberiledi» - delingen Shymkent qalasy polıtsııa departamentiniń baspasóz qyzmeti taratqan aqparatta.
