Shymkentte jańadan salynyp jatqan «Skat» áýe kompanııasynyń termınalynan órt shyqty

ShYMKENT. QazAqparat – Shymkentte «Skat» áýe kompanııasyna qarasty jańadan salynyp jatqan termınalda órt shyqty. Tórt qabatty ǵımarattaǵy órtti sóndirýge tótenshe jaǵdaılar qyzmetkerlerimen qatar áskerıler de jumyldyryldy, dep habarlaıdy QazAqparat tilshisi.

Qalalyq TJD baspasóz qyzmetiniń málimetinshe, jalyn búgin tańǵy 06.55-te shyqqan. Órt týraly habarlama túse salysymen oqıǵa ornyna №2 shaqyrtý boıynsha tótenshe jaǵdaılar qyzmetiniń 13 tehnıkasy men jeke quramnan 40 adam jáne apattyq medıtsınalyq ortalyǵynyń qyzmetkerleri jumyldyrylǵan. Sondaı-aq, №55652 áskerı bóliminen 6 qyzmetker men 2 dana tehnıka jáne áýejaıdyń memlekettik emes órt sóndirý qyzmetinen 7 qyzmetker men 2 dana tehnıka jetken.

«Órttiń saldarynan termınaldyń shatyrynyń kólemi 270 sharshy metr bolatyn aǵash bóreneleri janyp ketken. Órt saǵat 07:27-de oqshaýlanyp, saǵat 07:35-te tolyǵymen sóndirilgen. Qazirgi tańda órttiń shyǵý sebepteri anyqtalýda» delingen habarlamada.