Shymkentte jańa medıtsınalyq ortalyq ashyldy
Tórt qabatty ǵımaratta ornalasqan «MEDIKER 4K» ortalyǵynda turǵyndarǵa medıtsınalyq qyzmettiń barlyq túri kórsetiledi. Klınıkada sondaı-aq alǵashqy sporttyq medıtsına ortalyǵy jumys isteıdi. Onda kásipqoı sportshylar daıyndyq pen ońaltý protsesterin óte alady. Zamanaýı úlgide ashylǵan klınıka jetekshileri táýligine 500-ge deıin adam qabyldaı alamyz dep otyr. Al, mindetti áleýmettik medıtsınalyq saqtandyrý (MÁMS) sheńberinde memlekettik-jekemenshik áriptestik baǵdarlamasy boıynsha 30 000 adamǵa deıin qyzmet kórsetedi. Munda naýqastarǵa joǵary jaılylyq jaǵdaıynda dınamıkalyq baqylaý men derbestendirilgen tásildi júzege asyrýǵa múmkindik beretin dıagnostıkalyq jáne emdik qyzmetter kesheni qamtylady. MEDIKER kompanııalar tobynyń barlyq medıtsınalyq ortalyqtaryn biryńǵaı tsıfrlyq keńistikke biriktiretin jeke medıtsınalyq aqparattyq júıesi bar ekenin atap ótken jón.
Aıtalyq, tsıfrlyq tehnologııalardyń arqasynda, mysalǵa, Astanadaǵy MEDIKER dárigerleri Shymkent qalasyndaǵy áriptesterine qashyqtyqtan keńes bere alady. Sonymen qatar, «MEDIKER 4K» klınıkasynyń bazasynda Ulttyq Olımpıada komıtetimen, sporttyq jekpe-jek Konfederatsııasymen jáne sporttyq medıtsına Federatsııasymen tyǵyz yntymaqtastyq aıasynda sporttyq medıtsına ortalyǵy ashylǵan. Aldyńǵy qatarly sportshylar, halyqaralyq birinshilikter men Olımpıada oıyndarynyń chempıondary men júldegerleri qalpyna keltirý jáne fızıoterapııalyq em alady.
Ortalyqtyń negizgi baǵyty - balalarǵa qamqorlyq kórsetý. Astana, Almaty, Atyraý sııaqty qalalarda pedıatrııalyq kómek kórsetý salasynda kópjyldyq jumys tájirıbesi bola otyryp, MEDIKER kompanııasy Shymkent qalasynda da qyzmet kórsetý aımaǵyn keńeıtken. Klınıkada kópjyldyq tájirıbesi bar 3 000-ǵa jýyq dáriger men medıtsına mamandary jumys isteıdi.
