Shymkentte jańa «Erlik» fılmi jaryq kórdi
ShYMKENT. QazAqparat - 16-naýryz - "Ulttyq kıno men anımatsııa" kúni. Bul kúni Shymkentte jańadan jaryq kórgen «Erlik» tolyqmetrajdy fılminiń tusaýkeser rásimi ótti. Ońtústik Qazaqstan oblysy ákimdiginiń tapsyrysy boıynsha túsirilgen týyndyny kórermenge jergilikti "SAQ" kınostýdııasy usyndy, dep habarlaıdy QazAqparat HAA tilshisi.
Jastardyń boıynda eline, jerine degen súıispenshilikti damytý ıdeıasymen túsirilgen fılmdi kórýge qala jurtshylyǵymen qatar oblys ákimi Janseıit Túımebaev, belgili qalamgerler Marhabat Baıǵut, Nurǵalı Oraz bastaǵan top kelip tashamalady. Tolyqmetrajdy kınotýyndyda ońtústiktiń ásem tabıǵaty kórsetilip, ishki týrıstik áleýeti nasıhattalǵan. Al mazmuny «Saıram-Ógem» ulttyq parkinde jumys isteıtin ınspektor-ıeger Bolat pen onyń balasy Erboldyń arasynda órbıdi. Negizgi ıdeıa kez kelgen áke balasynyń baqyty úshin basyn báıgege tigedi degenge saıady. Aqyldy uldyń da óz paıym-parasaty, ustanymy bar. Qara basynyń qamyn oılamaı, jurt úshin jumyla eńbek etedi. Otanǵa opasyzdyq jasamaıdy. Stsenarıı avtory osylaısha turmys túıtkilderinen bólek, rýhanııatty da aldyńǵy qatarǵa shyǵarýdy kózdegen. Fılm avtorlary «Erliktiń» jastar júreginde tabıǵatqa degen súıispenshilik pen janashyrlyqty oıatady dep senedi.
Eske salaıyq, «Saq» kınostýdııasy buǵan deıin «Qoshqar men teke», «Tompaq» anımatsııalyq fılmderimen tanymal bolǵan.
