Shymkentte jańa bilim berý nysandary jumys isteı bastady

ASTANA. QazAqparat - Shymkent qalasynda búgin memlekettik-jekeshelik áriptestik aıasynda qos birdeı áleýmettik nysan paıdalanýǵa berildi. Úsh tilde bilim beretin eki ǵımarattyń ashylý saltanatyna Shymkent qalasynyń ákimi Ǵabıdolla Ábdirahymov arnaıy baryp qatysty, dep habarlaıdy qalalyq ákimdiktiń baspasóz qyzmeti.

Aldymen, ákimshilik-iskerlik ortalyǵynda salynǵan 320 oryndyq «Atameken» balabaqshasy el ıgiligine berildi. Bóbekjaı sońǵy talaptarǵa saı, zamanaýı qurylǵylarmen jabdyqtalǵan. Munda ár topqa arnalǵan oıyn alańshalary, qysqy-jazǵy shomylý basseınderi bar. Sonymen qatar, balalardyń qaýipsizdigi úshin barlyq bólmelerde jáne aýmaǵyna beınebaqylaý kameralary ornatylǵan. Jas órenderdiń  tárbıe alýyna jáne olardyń boıyna bilimniń alǵashqy negizin qalaýǵa qajetti jaǵdaıdyń barlyǵy jasalǵan. Jańa balabaqshada 100-den  astam jumys orny qurylyp otyr.

Osy kúni Saıram turǵyn alabynda 900 oryndyq jekemenshik «Arafat» jańa mektebiniń lentasy qıyldy. Mektepte balalardyń tolyqqandy bilim alýyna, salaýatty ómir saltyn qalyptastyrýǵa barlyq jaǵdaı jasalǵan.  Bilim ordasynda oqýshylardyń qolónermen, tigin tigýmen aınalysýyna, túrli óner úıirmeleri men sporttyq sharalarǵa qatysýyna múmkindigi bar.
 

Aıta keteıik,  jalpy shaharda  memlekettik jáne jekemenshik 147 mektep bolsa, olarda qazirgi tańda 200 myńǵa jýyq bala bilim alady. Al, jyl saıyn mektepke baratyn bala sany 20-25 myńǵa artyp keledi.  Bul degenimiz qalaǵa jyl saıyn kóptegen jańa mektepter salý qajettigin ańǵartady. ıAǵnı, mekteptiń máselesin sheshýde orta bilim salasyna jekemenshik kapıtaldy tartý qajet-aq.
 

QR Bilim jáne ǵylym mınıstrliginiń jańa júıesi boıynsha osyndaı jekemenshik salynǵan mektepterge memlekettik tapsyrys boıynsha jan basyna shaqqanda qarajat tólenedi. Búginde bul júıege  qaladaǵy birqatar mektepter kóshken.