Shymkentte jańa aýdannyń ákimi taǵaıyndaldy

ShYMKENT. QazAqparat - Shymkenttiń jańa aýdanynyń ákimi taǵaıyndaldy.

Shymkent qalasyndaǵy Qarataý aýdanynyń ákimi bolyp Ǵalym Ysmaıylov taǵaıyndaldy. Ol eńbek jolyn 1983 jyly Bógen qus fabrıkasynyń jumyskeri bolyp bastaǵan. Ǵ.Ysmaıylov kóptegen jyldar iri kásiporyndarda basqarýshylyq qyzmetterde eńbek etti. Budan basqa, ár jyldary turǵyn úı-kommýnaldyq sharýashylyq salasynda jumys istedi, Túrkistan qalasy ákiminiń orynbasary, eki ret Shymkent qalasy ákiminiń orynbasary qyzmetin atqarǵan.

Qalalyq ákimdiktiń baspasóz qyzmetiniń málimetterinshe, Qarataý aýdanynda 209 myńnan astam adam turady, aýdanǵa ondaǵan shaǵynaýdandar biriktirilgen. Onyń aýmaǵynda eki JOO, úsh kolledj, 32 mektep, 32 balabaqsha, 23 densaýlyq saqtaý mekemesi, 5 mádenı nysan jáne 7 sporttyq nysan ornalasqan.