Shymkentte jalpyhalyqtyq senbilik ótti

ShYMKENT. QazAqparat - Alǵys aıtý merekesi qarsańynda Shymkentte «Tazalyq kúni» sharasy ótti. Jalpyhalyqtyq senbilikke etnomádenı birlestikterdiń músheleri men zııaly qaýym ókilderi, jastardan quralǵan jalpy 20 myńǵa tarta adam qatysty, dep habarlaıdy QazAqparat tilshisi.

Qala ákimdiginiń bastamasymen qolǵa alynǵan senbilikke qatysýshylar tórt aýdandaǵy saıabaqtar men gúlzarlardy, aýlalar men kóshelerdi jáne aryq-atyzdardy qoqystan tazartty. Al, osy is-sharaǵa uıytqy bolǵan qalalyq Qazaqstan halqy Assambleıasy men 16 etnomádenı birlestik tóraǵalary Qoshqar ata ózeniniń boıynda senbilik uıymdastyrdy. Olar jaı jáne qylqan japyraqty aǵashtar otyrǵyzyp, oıyn alańshalaryn syrlady. Aǵashtardyń túpterin áktep, jasyl jelekterdi tazalaý jumystaryn atqardy.

Jalpy bul kúni qaladaǵy 30 shaqyrym aıaqjol men 103 shaqyrym bolatyn kóshe boılary jáne 35 shaqyrymdyq ırrıgatsııalyq júıeler tazartyldy. Bul jumystarǵa 40 shaqty tehnıka jumyldyryldy.

«Kún sanap kórkeıip kele jatqan qalamyzdyń taza, ádemi bolýyna jáne kórkeıýine úles qosý - ár turǵynnyń paryzy dep sanaımyn. «Tazalyq kúni» aıasynda kópshilik demalatyn qasıetti oryndarda tazalyq jumystary júrgizildi. Sándik aǵash kóshetteri otyrǵyzyldy. Búgingi sharanyń tazalyqpen qatar, halyqty yntymaqqa úndeıtin mán-mańyzy zor ekenin de erekshe aıtqym keledi», - deıdi uıǵyr etnomádenı birlestiginiń tóraıymy Gýzal Temırova.