Shymkentte jalǵyzbasty 83 jastaǵy qart ananyń úıi órtenip, kóshede túnep júr
ShYMKENT. QazAqparat - Shymkentte jalǵyzbasty 83 jastaǵy qart ananyń úıi órtenip ketti. Sonyń saldarynan dalada qańǵyp qalǵan ana kóshede túneýge májbúr, dep habarlaıdy QazAqparat HAA tilshisi.
Oqys oqıǵa on kún buryn qart ananyń jaqyn týysynyń janazasyna ketken kezde oryn alǵan. Jatyn bólmeniń elektr shamynan tutanǵan jalyn úıdiń ishin alyp ketken. Shyǵa beris esiktiń mańy otqa oranǵanda qart ana úıine oralypty. Onyń janaıqaıyna birinshi kórshileri jetip, órtti sóndirmek bolǵan. Alaıda odan nátıje shyqpapty. Onsyz da balasy men qyzy qaıtys bolǵan áıeldiń hali múldem múshkil edi. Endi sharpyǵan jalyn jyǵylǵanǵa judyryq boldy. Sebebi, bes jyldan beri jalǵyz turatyn baspanasy men azyn-aýlaq dúnıe-múlki janyp ketti. Odan keıin jaqyn mańdaǵy kórshiler onyń as-sýyn daıyndap, keshke kezekpen úılerine qondyrǵan. Qınalǵan sátte qoltyǵynan demep, qoldaý bildirýde. Dese de kóshiler ýaqytsha qaraılasqanymen baspanasyn qaıta qalpyna keltirýge dármensiz. Olardy ábigerge salmaý úshin Rahıma apa eki kúnnen beri dalada qonyp júr. Janyp ketken zattaryna qaraǵan saıyn jany jabyrqaıdy. Óıtkeni tamaq ázirleıtin ydys-aıaǵy da jaramsyz. Qansha qınalsa da Jaratqannyń synaǵyna sabyr saqtap, shúkir,-deıdi. Qajyǵan qart qamqorlyq jasap, saýapqa kenelgisi keletin azamattar bolsa dep ishteı armandaıdy.
