Shymkentte jalǵan aqsha jasaǵan Nıgerııanyń eki azamaty sottaldy
ASTANA. QazAqparat - Shymkentte jalǵan AQSh valıýtalaryn jasap, ótkizbek bolǵan Nıgerııanyń eki azamaty sottaldy, dep habarlaıdy QazAqparat.
Olar ótken jyldyń qyrkúıek aıynda ustalǵan bolatyn. Tergeý málimetteri boıynsha, 39 jastaǵy Nvoke Ekenderıchýkvý men 30 jastaǵy Oba Jozefat Shymkentke Qazaqstanǵa aǵylshyn tilinen sabaq berý úshin kelgen-mys. Olar páter jaldap turǵan. Alaıda, dáris berýdiń ornyna jalǵan sheteldik valıýtany ótkizýmen aınalysqan.
Bastapqyda 16 myń dollardy valıýta aıyrbastaý pýnktine ótkizýge tyrysqan. Kásipkerdi qomaqty qarajatty arzan baǵaǵa satyp alýǵa kóndirip, ózara ýaǵdalasqan. Dese de, sheteldikterdiń márttigine kúdiktengen kásipker oblystyq Memlekettik kirister departamentine aryzdanǵan.
Nıgerııalyqtardyń páterin tintý kezinde jalǵan banknottar tabyldy. Anyqtalǵandaı, olar kók qaǵazdardy arnaıy hımııalyq suıyqtyqpen óz elderinen boıap ákelgen.
Atalmysh fakti boıynsha qylmystyq is qozǵalyp, sheteldik azamattar qamaýǵa alynǵan bolatyn. Búgin Ál-Farabı aýdandyq sotynyń sýdıasy Talǵat Qaharov qos kúdiktini kináli dep taýyp, 5 jylǵa bas bostandyqtarynan aıyrdy. Alaıda, elimizde raqymshylyq zańynyń qoldanylýyna baınysty jazalaryn óteý merzimderi 3 jyl 9 aı dep belgilendi.
Aınur Aqbaeva
