Shymkentte zańsyz qarý alyp júrgen kúdiktiler ustaldy
Shymkent qalasy Polıtsııa departamentiniń qyzmetkerleri tótenshe jaǵdaı kezinde qala aýmaǵyndaǵy qaýipsizdikti qamtamasyz etýde. Arnaıy is-sharalar barysynda ózimen birge qarýdy zańsyz alyp júrgen, sonymen qatar basqa da zań buzýshylyq jasaǵan birneshe kúdikti anyqtalyp, ustaldy.
Atap aıtqanda, A.Asqarov kóshesiniń boıynda «Lexus RX-330» avtokóligin toqtatqan tártip saqshylary kólik ishinen atys tapanshasyn tapty. Atalǵan avtokóliktiń júrgizýshisi men jolaýshysy ýaqytsha ustaý ızolıatoryna qamaldy.
8-shaǵynaýdan aýmaǵynda jedel is-sharalar júrgizý barysynda, ondaǵy jaldamaly páterlerdiń birin jalǵa alǵan 1995 jyly týǵan Almaty oblysynyń turǵyny men 1991 jyly týǵan Túrkistan oblysynyń turǵynyn tekserdi. Nátıjesinde biriniń kúrteshesiniń qaltasynan 4 dana 5,45-mm kalıbrli oq-dáriler jáne qol sómkesinen ártúrli markaly 42 dana uıaly telefondar men 4 dana noýtbýk tárkilendi.
Sondaı-aq, Patrýldik polıtsııa polkiniń ınspektory ózine bekitilgen aýmaqty patrýldeý kezinde «Hundai Starex» markaly avtokólikti toqtatyp, tekserý kezinde kóliktiń jolaýshysy ózimen birge sholaq myltyq pen onyń oq-dárilerin alyp júrgenin anyqtaǵan. Qazirgi tańda kúdikti azamat ýaqytsha ustaý ızolıatorynda.
Polıtsııa qyzmetkerlerimen qala joldarynda kezekshilik etý kezinde Asar shaǵynaýdanynyń aýmaǵynda «LADA-2114» avtokóliginen 1 dana bıta men oq-dáriler anyqtalǵan.
Qarataý aýdany Polıtsııa basqarmasynyń qyzmetkerleri Nursat shaǵynaýdanyndaǵy jaldamaly páterlerdi tekserý kezinde, olardyń biriniń balkonynan úlken tastar taýyp alǵan.
Shymkent-Samara tas jolynda ornalasqan «Badam» buǵattaý beketinde «Toyota Land Cruiser» kóligin tekserý barysynda atys tapanshasy tabylyp, tárkilendi.
Atalǵan jaıttar boıynsha qazirgi tańda qylmystyq ister tirkelip, sotqa deıingi tergep-tekserý jumystary júrgizilýde.