Shymkentte zańsyz ishimdik daıyndaıtyn jasyryn tseh anyqtaldy

ShYMKENT. QazAqparat – Shymkentte zańsyz alkogol ónimin daıyndaıtyn jasyryn tseh anyqtaldy, dep habarlaıdy QazAqparat QR Qarjy monıtorıngi komıtetiniń baspasóz qyzmetine silteme jasap.

Shymkent qalasynda júrgizilgen jedel-izdestirý is-sharalarynyń nátıjesi boıynsha jalǵan esepke alý-baqylaý markasy bar alkogol ónimin daıyndaıtyn astyrtyn tseh qyzmetiniń joly kesildi.

Óndirilgen ónim Shymkent qalasynyń aýmaǵynda satylyp kelgen.

«Tekserý barysynda jalǵan EBM bar «Rýsskaıa na brýnkah» jáne «Berezovaıa» markaly 2 myń bótelkeden astam alkogol ónimi, 160 lıtr spırt, 10 myńnan astam marka, suıyqty aralastyrýǵa arnalǵan sorǵy, alkogolge arnalǵan 140 bos qorap jáne 80-nen astam bos bótelke, 400-den astam qaqpaq tárkilendi», delingen habarlamada.

Komıtettiń málimdeýinshe, atalǵan fakt boıynsha Qylmystyq kodekstiń 233-baby 2-bóligimen (kórineý jalǵan esepke alý-baqylaý markalaryn paıdalaný nemese ótkizý) boıynsha sotqa deıingi tergeý isi bastaldy. Qazirgi ýaqytta tıisti saraptama men tergeý amaly júrgizilip jatyr.