Shymkentte vırýsqa qarsy dárilerge suranys úsh ese artqan
Mamandardyń sózinshe, elimizde dáriniń 6191 túri satylymda bolsa, onyń tek 125 túri ǵana Shymkentte shyǵarylady. Al, qaladaǵy 730-den asa dárihana bólshek saýdamen aınalysady. Onyń 60%-y - úlken, qalǵany – shaǵyn dárihanalar.
Dese de, qazirgi tańda JRVI, pnevmonııa jáne tumaýdyń basqa da túrimen aýyrǵandar sanynyń kúrt kóbeıýine baılanysty birqatar dárilerdiń tapshylyǵy artyp otyr. Onyń sebebin farmatsevter tutynýshylyrdyń vırýsqa qarsy preparattardy kóp mólsherde satyp alyp jatqandyǵymen túsindiredi. Al ony tolyq qamtýǵa kishigirim dárihanalardyń kúshi jete bermeıdi.
Degenmen qalada 77 dáriniń túrine monıtorıng júrgizilip, mamandar 240 myń qaptamada paratsetamol bar ekenine kóz jetkizgen.
Sondaı-aq, dárigerdiń nusqaýynsyz beriletin ózge de dárilerdiń jetkilikti ekenin anyqtaǵan. Alaıda dári qoımalarda bar bolǵanymen, dárihanaǵa jetken soń tez taýsylyp qalýda. Sebebi, shaǵyn dárihanalarda dári qory az bolady.
«Halyq retseptsiz bosatylǵan dárilerdi jappaı satyp alýda. Bul durys emes. Dárilerdiń merzimi men saqtaý joldary bar. Eger ol durys saqtalmasa, adam aǵzasyna keri áser etedi. Sondyqtan dárilerdi, meılinshe, dárigerdiń nusqaýlyǵymen satyp alý kerek. Qoımalarda dáriler bar, biraq dárihanalarǵa jetken soń, tez taýsylyp qalyp jatyr», – deıdi qalalyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Lázzat Qashqynbaeva.
Budan bólek, L.Qashqynbaeva dárihanadaǵy baǵanyń ósip ketpeýine monıtorıng júrgizetinin alǵa tartty. Onyń aıtýynsha, 2019 jyly QR Densaýlyq saqtaý mınıstrliginiń 104-buıryǵymen 6191 dárige shekteýli baǵa kórsetilgen.
Eger dárihana ıeleri osy shekteýdi eskermeı, dári baǵasyn negizsiz kóteretin bolsa úlken dárihanalarǵa - 100 AEK, al shaǵyn dárihanalarǵa - 70 AEK mólsherinde aıyppul salynady.
