Shymkentte velosıped jelisin qurý boıynsha bes jyldyq strategııa tanystyryldy

ShYMKENT. QazAqparat – Búgin Shymkent qalasynyń ákimi Erlan Aıtahanovtyń nazaryna velosıped jelisin qurý boıynsha bes jyldyq strategııa tanystyryldy. Jańa strategııany «Shymkent» ÁKK» AQ men «Velocity» qoǵamdyq qory Copenhagenize Dezign Company qatysýymen birge ázirlegen, dep habarlaıdy QazAqparat tilshisi.

Qala basshysyna jobany Copenhagenize Design Co kompanııasynyń bas dırektory Morten Keıbll tanystyryp ótti. Jańa jobada QR Prezıdenti Qasym-Jomart Toqaevtyń Joldaýynda kórsetilgen qala turǵyndaryna qolaıly jaǵdaı jasaý sııaqty basym baǵyttar qarastyrylǵan.

Atap aıtqanda, qolaıly qala ortasyn qurý, joldar máselelerin jeńildetý, qala turǵyndaryn salaýatty ómir saltyna tartý jáne týrızmdi damytý máseleleri eskerilgen. Velostrategııa 5 kezeńnen tursa, búginde qalada onyń 4 kezeńi aıaqtalǵan. Buǵan deıin jasalǵan ınfraqurylymǵa bes jyldyq jospar boıynsha 250 shaqyrym velojol salý josparlanyp otyr. Al onyń 50 shaqyrymyn 2020 jyly aıaqtaý kózdelýde.

Investorlardyń aıtýynsha, atalǵan joba júzege assa, búgingi tańda jumys istep jatqan 40 velostansadan bólek taǵy 50 stansa qurý kózdelip otyr. Velosıped jelisin damytý boıynsha usynylǵan jobaǵa ákim óziniń birqatar usynystaryn aıtyp, tórt jolaqty kóshelerdi qysqartyp, ony velojol jasaýǵa qarsy ekenin jetkizdi. Sebebi, halqy tyǵyz ornalasqan megapolıste kólik keptelisi jıi oryn alatynyn jáne turǵyndarǵa qolaısyzdyq týdyratynyn atap ótti.

Sondyqtan shahar basshysy bes jyldyq josparda velojoldy eń aldymen jasyl beldeý aýmaǵynan bastap salýdy usyndy. Jıyndy qorytyndylaǵan Erlan Aıtahanov atalǵan velosıped strategııasyn qoldaıtynyn, joba nátıjeli iske asyrylý úshin arnaıy jumysshy top qaıta qaraý kerektigin aıtty.