Shymkentte vaktsına alýdan bas tartqan balalar qyzylsha juqtyryp jatyr

ShYMKENT. QazAqparat - Respýblıka boıynsha qyzylshanyń 291 jaǵdaıy tirkeldi, onyń ishinde 182 jaǵdaı rastaldy, dep habarlaıdy QazAqparat sanıtarlyq-epıdemıologııalyq baqylaý komıtetine silteme jasap.

Shymkent qalasynda 2021-2022 jyldary qyzylsha aýrýy tirkelmegen edi.

Alaıda bıyl jyldyń basynan beri qyzylshanyń 13 jaǵdaıy tirkeldi, onyń ishinde 9 jaǵdaıy zerthanalyq rastaldy.

Aýyrǵandardyń ishinde 8 jaǵdaı 14 jasqa deıingi balalar arasynda tirkelgen, onyń ishinde qyzylshaǵa qarsy ekpeni almaǵan balalar - 85,7%.

Qyzylsha – aýa-tamshy jolymen taralatyn vırýsty juqpaly aýrýlardyń biri. Vırýs syrtqy ortaǵa aýyrǵan adam sóılegende, jótelgende, túshkirgende bólinedi jáne óte tez taralady.

Bul aýrýmen aýyryp jazylǵan adam ómir boıy ımmýnıtetin saqtaıdy. Qyzylshamen aýyrǵan analardan týylǵan balalar 3 aıǵa deıin bul aýrýǵa shaldyqpaıdy, óıtkeni osy aralyqta olardyń qanynda anasynan berilgen antıdene saqtalady.

Bul aýrýmen aýyrmaǵan jáne egilmegen adamdar qyzylshany juqtyrýǵa beıim bolady jáne óziniń ómirinde kez-kelgen jasta aýrý juqtyrýy múmkin.

Naýqaspen baılanysta bolǵandar 21 kún medıtsınalyq baqylaýda bolady jáne 72 saǵat ishinde egýge jatatyndar egiledi.

Inkýbatsııalyq kezeń (juqtyrǵannan keıin birinshi belgileri paıda bolǵanǵa deıin) 7 kúnnen 21 kúnge deıin sozylady.

Qyzylshanyń asqynýy: eń kóp taraǵan túri ortańǵy qulaqtyń qabynýy (otıt), soqyrlyq, bronhtyq pnevmonııa, moıyn lımfotúıinderiniń qabynýy, larıngıt, entsefalıt.

Eger sýyq tııý belgileri paıda bolsa, dárigerdi úıge shaqyryp, em qabyldaýmen tekserýden ótý kerek. Naýqastarǵa ýaqtyly dıagnoz qoıý, emdeýdi taǵaıyndaý jáne uıymdasqan ujymǵa barǵan jaǵdaıda ony oqshaýlaý jáne ınfektsııanyń odan ári taralýyn boldyrmaý úshin aldyn alý sharalaryn ýaqtyly júrgizý qajet.

Qyzylshanyń aldyn alýdyń eń tıimdi, senimdi jáne balamaly joly – vaktsınatsııa.

QR Ulttyq egý kúntizbesine saı eń alǵashqy vaktsınatsııa deni saý kezinde balalarǵa 12-15 aılyǵynda, ekinshisi 6 jasta jasalady.