Shymkentte úzdik taýarlar kórmesi ótti

ShYMKENT. QazAqparat – Shymkenttegi «Kórme» ortalyǵynda «Qazaqstannyń úzdik taýary» aımaqtyq kórme-baıqaýy jáne «Ońtústik ónimderi» atty kórme-jármeńkesi ótti. Sharaǵa tamaq, farmatsevtıkalyq, ınjenerlik, jeńil jáne qurylys ındýstrııasy ónimderiniń 100-ge jýyq otandyq taýar óndirýshi kompanııalary qatysyp, óz ónimderin usyndy, dep habarlaıdy QazAqparat tilshisi.

Jergilikti taýar óndirýshilerdi qoldaý maqsatynda uıymdastyrylǵan kórmeniń ashylý saltanatyna Shymkent qalasy ákiminiń orynbasary Gúljan Qurmanbekova men qalalyq «Atameken» kásipkerler palatasy óńirlik keńesiniń tóraǵasy Qaırat Moldaseıitov, sondaı-aq palata dırektory Nurlan Qabyshtaev qatysyp, quttyqtaý sóz sóıledi. Qala ákimdigi men Kásipkerler palatasy birlese uıymdastyrǵan is-shara aıasynda «Halyq tutynatyn úzdik taýarlar», «Óndiristik maqsattaǵy úzdik taýarlar», « Úzdik azyq-túlik taýarlary» boıynsha nomınatsııa ıegerleri anyqtaldy.

Jeńimpaz taýar óndirýshiler jyl sońynda Nur-Sultan qalasynda ótetin «Qazaqstannyń úzdik taýary» respýblıkalyq baıqaýyna qatysý quqyǵyna ıe boldy.

Sonymen qatar kórmede eń úzdik kompanııalar tańdalyp, aımaqtyq nomınatsııalarmen marapattaldy. Al, kelýshilerge oıyn-saýyq baǵdarlamalar men syılyqtar usynylyp, utys lotoreıalar oınatyldy. Baǵaly syılyqtar tabystaldy.