Shymkentte úıleri súriletin turǵyndar beriletin ótemaqynyń kólemine qarsy shyqty
ShYMKENT. QazAqparat - Shymkentte úıleri súriletin turǵyndar beriletin ótemaqynyń kólemine kóńilderi tolmaıdy. «Eski shahar» qalashyǵyndaǵy baspanalardyń ıeleri jergilikti bıliktiń usynǵan baǵasyna kelispeı otyr, dep habarlaıdy QazAqparat HAA tilshisi.
Qala bıligi «Eski shahardaǵy» turǵyn úıler súreletini týraly habar bergeli beri mundaǵy jurttan maza qashty. Turǵyndar bul jerden ashyq aspan astyndaǵy murajaı salynatynyna qarsy emes. Qalanyi Bas josparyna sáıkes, qolǵa alynǵan aýqymdy jobanyń júzege asyrylýyn da qoldaıdy. Alaıda, «úıleri men jer telimderine beriletin aqshaǵa kóńilimiz tolmaıdy» dep otyr.
«Sot meniń úıime 7 mln teńge kóleminde ótemaqy tólensin dep sheshim shyǵardy. Al, biraq men bul somaǵa eshteńe ala almaımyn. Qazirgi zamanda bul aqshaǵa menikindeı úı kelmeıdi ǵoı. Onyń ústine barlyq balalarym aýrý. Ózim de ekinshi toptaǵy múgedek, jalǵyzbasty anamyn»,- deıdi Rahıma Gııaeva.
Eski qalashyqtyń turǵyndary negizinen erterekte kelip qonystanǵandar. Keıbiriniń úıleri tym eski. Qabyrǵalary sógilip, irgetasy jerge kirip ketken. Sonda da jergilikti halyq bolmashy ótemaqy alǵansha, osy jerde tura bergenimiz durys degendi aıtady.
«Maǵan 8 mln 700 myń teńge berip tur. Men bul jerde káriz qubyrlaryn tartqyzyp, sý júıesin de júrgizip qoıǵanmyn. Onyń barlyǵy aqsha. Al, maǵan beriletin ótemaqyǵa men tek qana qalanyń shetinen jer alamyn. Al, úıdi buzyp alyp ketemiz desek, ruqsat bermeıdi. Onyń ústine úı salýǵa qajetti qurylys materıaldarynyń baǵalary da qymbat», - deıdi Darıǵa Dýlatova.
Bastysy turǵyndardy kadastrlyq shyǵyn emes, baǵalaý quny qyzyqtyryp tur. Eger úıdiń qunyn durys esepteıtin bolsa, ortaq kelisim jasasýǵa bolatynyn aıtady. Qalaı bolǵanda da ákimdiktiń sheshimi boıynsha eski qalashyqtaǵy 73 nysan súriledi. Ondaǵy bir-birine óte tyǵyz ornalasqan úsh kóshe buzylady dep josparlanǵan. Sóıtip, bas-aıaǵy 29 gektar jer tazartylady. Mamandardyń sózinshe, ashyq aspan astyndaǵy murajaıdyń bir jaǵynan Dinmuhambet Qonaev atyndaǵy dańǵyl túsedi. Jańa joba qalany odan ári damytýǵa negizdelgen. Sondyqtan, osyndaǵy turǵyndarǵa eskertý hat berilgen.
«Biz ózimizdiń tarapymyzdan Úkimetten alǵan jer teliminiń kadastrlyq qunyn berýge daıynbyz nemese eger tirkelgen barlyq qujattary durys bolsa, biz tek qana naryqtaǵy qunyn tóleımiz», - deıdi Shymkent qalalyq jer qatynastary bólimi basshysynyń orynbasary Narıman Qasymbekov.
Turǵyndar osy máseleni aıtyp Qoshqar ata ózeniniń mańynda narazylyqqa shyqty. Bıliktegilermen jolyǵyp, óz ýájderin aıtty. Endi ol áreketterinen qandaı da bir nátıje shyǵa ma joq pa ony ýaqyt kórsetedi.
