Shymkentte úılený toıynda atys boldy

ShYMKENT. QazAqparat - Qarashanyń 14-nen 15-ine qaraǵan túni toıda birneshe qonaq janjaldasyp qalǵan, dep habarlaıdy QazAqparat Shymkent qalalyq polıtsııa departamentiniń baspasóz qyzmetine silteme jasap.

Tóbeleskenderdiń biri travmatıkalyq qarýmen qonaqtyń bireýin birneshe ret oq atyp, mańdaıy men ishinen jaraqattaǵan. Sol sátte taǵy bireý zardap shegýshiniń artynan kelip keýde tusyna pyshaq suǵyp alǵan.

Qarý qoldanǵan jigitter keıin «Mazda» kóligimen qylmys bolǵan jerden boı tasalamaq bolǵan. Alaıda, olar oqıǵa ornyna kelip jetken polıtsııa departamentiniń arnaıy kóligimen soqtyǵysqan.

Zardap shegýshi qalalyq aýrýhanaǵa jatqyzyldy, oǵan qajetti medıtsınalyq kómek kórsetilip jatyr.

Polıtsııa qyzmetkerleri tóbeleskenderdiń barlyǵyn anyqtap, kúdiktilerdi ustady. Qazir sotqa deıingi tergep-tekserý amaldary júrgizilýde.