Shymkentte úıinen shyǵyp ketip, adasyp qalǵan 10 jastaǵy bala tabyldy
Qalalyq PD baspasóz qyzmetiniń málimetinshe, ata-anasy ulynyń úı aýlasynda oınap júrgenin, keıin tappaı qalǵandyǵyn aıtqan.
«Tártip saqshylar jedel-izdestirý is-sharalaryn júrgizý barysynda kóshede jalǵyz jylap júrgen balany kórip, polıtsııa basqarmasyna jetkizdi. Tártip saqshylarynyń surastyrý barysynda balanyń adasyp qalǵanyn anyqtap, ony ata-anasyna tapsyrdy», delingen habarlamada.
Polıtsııa departamenti sondaı-aq, Jergilikti polıtsııa qyzmeti basqarmasymen jasóspirimder arasyndaǵy qylmystardyń aldyn alý maqsatynda «Jasóspirim» is-sharasyn ótkizýde. Shara ótkizilgen úsh kún ishinde polıtsııa qyzmetkerleri Іshki ister organdaryna 150 jasóspirimdi jetkizgen.
Ata-anasynyń qadaǵalaýynsyz júrgen 25 jasóspirim Kámeletke tolmaǵandardy beıimdeý ortalyǵyna ornalastyrylsa, 107 jasóspirim bala túngi ýaqytta zańdy ókilinsiz turǵyn úıden tys jerlerde júrgeni anyqtaldy. Taǵy 5 jasóspirim túngi ýaqytta oıyn-saýyq mekemesinen tabylǵan.
Barlyq jasóspirimderdiń ata-analaryna ákimshilik shara qoldanyldy. Budan ózge túngi ýaqytta oıyn-saýyq mekemesinde bolýǵa jol bergen 4 jeke kásipkerge ákimshilik quqyq buzýshylyq hattamasy toltyryldy.
Quqyqbuzýshylyqqa beıim 14 jasóspirim jáne 20 jaısyz otbasy ishki ister organynyń esebine alyndy. Kámeletke tolmaǵandar isi jáne olardyń quqyqtaryn qorǵaý komıssııasynda qaraýǵa 5 materıal joldandy. Onyń ishinde, ata-analyq quqyqtarynan aıyrý maqsatyn kózdeıtin - 2, Kentaý qalasyndaǵy arnaıy mektep-ınternatqa joldaýdy qarastyratyn 3 materıal bar.