Shymkentte úıindi astyndaǵy jumysshylardy shyǵarǵan qutqarýshy aýrýhanaǵa jatqyzyldy
ShYMKENT. QazAqparat - Shymkentte úıindiniń astynda qalyp qoıǵan jumysshylardy arshyp alǵan qutqarýshy aýrýhanaǵa jatqyzyldy. Qazir dárigerler Muhıt Ibragımovtiń jaǵdaıynyń qalypty ekenin aıtady, dep habarlaıdy QazAqparat HAA tilshisi.
«Naýqas Muhıt Ibragımov túsken kezinde rentgen, kompıýterlik tamografııa jasalyp, naqty dıagnozy anyqtaldy. Onyń bel omyrtqalaryna zaqym kelgen, isingen. Jalpy jaǵdaıy ortasha. Emin qabyldap jatyr. Ázirge kóp qımyldaýyna bolmaıdy. Biraq aldaǵy ýaqytta júrip ketedi»,- deıdi Shymkent qalalyq jedel járdem aýrýhanasynyń dáriger-travmatology Nurlan Qojambekov.
Al, káriz qubyryn tartamyz dep úıindiniń astynda qalǵan 4 jumysshy jedel járdem aýrýhanasynda alǵashqy medıtsınalyq kómek alyp, túngi on birler shamasynda úılerine qaıtarylǵan. 25 jáne 29 jastaǵy tórt jumysshy óz úılerinde em qabyldaıdy.
Eske salaıyq, kúni keshe Shymkenttiń Tastaq kóshesinde 4-5 metrlik tereńdikte jer qazyp, káriz qubyrlaryn tartyp jatqan «ıÝgsantehmontaj» seriktestiginiń 4 jumysshysyn topyraq basyp qalǵan bolatyn. Biraz ýaqyt boıy úıindi astynda qalǵandardy janyndaǵylar shyǵara almaǵan soń, qutqarýshylardy shaqyrtqan. Olardy úıindiden shyǵaryp alýǵa 9 qutqarýshy men 2 tehnıka jumyldyryldy. Nátıjesinde túrli jaraqat alǵan tórteýdi jedel járdem qyzmeti alyp ketti. Dárigerler sondaı-aq jumysshylardy qutqarýǵa kelgen qutqarýshylardyń birin de aýrýhanaǵa jetkizdi. Qutqarý sharalary kezinde onyń da ústine topyraq qulap, orta dárejede jaraqat alǵan. Qazir óńirdiń tótenshe jaǵdaılar qyzmeti men eńbek ınspektorlary bolǵan oqıǵanyń mán-jaıy men sebep-saldaryn anyqtap jatyr.
