Shymkentte úıinde qaıtys bolǵan turǵynnyń máıitin ashyqqan ıti jeı bastaǵan

NUR-SULTAN. QazAqparat – Shymkentte óz úıinde qaıtys bolǵan turǵynnyń máıitin ashyqqan ıti jeı bastaǵan. Bul týraly qalalyq Polıtsııa departamentinen málim etti, dep habarlaıdy QazAqparat.

«Bıylǵy 5 mamyrda, saǵat 12:50 shamasynda Shymkent qalalyq Polıtsııa departamenti Qarataý aýdandyq polıtsııa basqarmasyna jergilikti turǵynnan aýdanda ornalasqan úılerdiń biriniń aýlasynan er adamnyń máıiti tabylǵany týraly habarlama kelip tústi.
Oqıǵa ornynda jedel-tergeý toby muqııat tekserý júrgizdi. Kóz jumǵan er adamnyń jeke basy anyqtaldy. Ol 1958 jyly týǵan jergilikti turǵyn bolyp shyqty. Er adam úıinde jalǵyz ózi ıtimen turǵan.
Aldyn ala boljam boıynsha, er adam qaıtys bolǵannan birneshe kún ótken soń, ashyǵyp qalǵan ıt ıesiniń máıitin jeı bastaǵan», - dedi PD-dan.

Sotqa deıingi tergep-tekserý aıasynda er adamnyń ólim sebebin anyqtaýǵa baǵyttalǵan birqatar saraptama taǵaıyndaldy

«Tekserý nátıjeleri boıynsha protsessýaldyq sheshim qabyldanatyn bolady», - dep naqtylady polıtsııadan.