Shymkentte úı alamyn deýshilerge ákimdik sýbsıdııa beretin boldy

ShYMKENT. QazAqparat - Búgin Shymkent qalasynyń ákimi Ǵabıdolla Ábdirahymov pen «Baspana» kompanııasynyń basshysy Qaırat Altynbekov áriptestik memorandýmyna qol qoıdy, dep habarlaıdy QazAqparat.

Ekijaqty kezdesý barysynda Shymshahar basshysy baspanaly bolǵysy keletin azamattarǵa ákimdik tarapynan 20 % bastapqy jarnanyń teń jartysy kóleminde qaıtarymdy sýbsıdııa beriletinin jetkizdi.

«Kóptegen azamattarǵa 20% kólemindegi bastapqy jarnany tabý qıyn, sondyqtan qala ákimdigi qosymsha 2 mlrd teńge bóledi. Bul qarjynyń 500 mln teńgesi bıyl bólinedi. Qarajat jas otbasylar men bıýdjettik qyzmetkerlerdiń baspanaly bolýyna múmkindik beredi»,- dedi Ǵabıdolla Ábdirahymov.
 

Aıta keteıik, «7-20-25» baǵdarlamasy Shymkentte eki baǵytta júzege asyrylmaq. Jas otbasylarǵa arnalǵan «Jas arman» jáne memlekettik, bıýdjettik qyzmetkerlerge arnalǵan «Qamqor baspana» baǵdarlamasy. «Baspana» kompanııasynyń basshysy Qaırat Altynbekov bolsa, jańa baspana baǵdarlamasy ıpotekalyq nesıe alýdyń qolaıly sharttaryn usynatynyn aıtady. 

«Shymkentte búginde baspana máselesi óte ózekti. Jańa baǵdarlama baspanany jalǵa alýdan góri tıimdi bolmaq. Onyń ústine, jergilikti ákimdik alǵashqy jarnanyń sýbsıdııasymen kómektesedi. Bizdiń kompanııa da baǵdarlamanyń damýyn qoldaý úshin 20 mlrd teńge bóledi»,- dedi kompanııa basshysy.

Qaırat Altynbekovtyń sózinshe, Shymqalada «7-20-25» baǵdarlamasy aıasynda salynǵan 8 turǵyn úı keshenindegi 136 páter daıyn tur. Al, jyl sońyna deıin jalpy sany 411 páterdiń qurylysy aıaqtalady. Búgingi tańda bul baǵdarlamaǵa qatysýǵa 21 turǵynnan ótinish túsken.