Shymkentte úshem dúnıege keldi
ASTANA. QazAqparat - Shymkenttegi №1 oblystyq perınataldyq ortalyǵynda úshem dúnıege keldi. Bul - Ońtústik Qazaqstan oblysynda jyl basynan beri ómirge kelgen ekinshi úshem, dep habarlaıdy QazAqparat.
Baqytty ana Gúljanat Perdebaevanyń endi 5 balasy bar. Ul men qyzdyń anasy úshem bolatynyn tórt aılyq kezinde bilgen eken. Jas ana úsh ul balany naýryzdyń 5 kúni ota jasaý tásilimen bosanǵan. Dárigerlerdiń aıtýynsha, 35 aptada dúnıege kelgen sábılerdiń salmaǵy 2400-2700 gramm aralyǵynda, boılary - 45-48 sm. Olar bir aptadan asa ýaqyttyń ishinde salmaq qosyp, jaǵdaılary jaqsardy.
Úshemniń ata-anasy Muhtar men Gúljanat Shardara aýdanynyń turǵyndary. Elýbaevtar áýletinde dúnıege kelgen úsh atustarǵa ata-ájeleri Erasyl, Nurasyl, Janasyl degen esim qoıǵan. Olar osydan úsh jyl buryn atajurtqa Ózbekstannan kóship kelgen.
Jalpy statıstıkalyq málimetke súıensek, sońǵy 10 jyldyń ishinde oblysta jyl saıyn 7-13 úshem dúnıe esigin ashady. Osy ýaqyt ishinde 81 úshem týǵan. Al bir jylda dúnıege keletin egizderdiń sany - 800-ge jýyq. On jylda týǵan jergilikti egizder sany - 7 myńnan asady. Tek sońǵy merekelik bes kúnniń ózinde oblys aýmaǵynda 700-ge jýyq sábı ómirge kelgen.
Aıta keteıik, 2017 jyly oblysta 76 353 náreste jaryq dúnıege keldi. Olardyń jartysyna jýyǵy Shymkent qalasynda týǵan. Bala týý kórsetkishi boıynsha alǵashqy qatarda Túrkistan qalasy, Saryaǵash, Maqtaaral jáne Saıram aýdandary tur.
Avtor foto: Kaısar Sherım
