Shymkentte úsh balanyń ólimine sebepshi bolǵan dezınfektor sottaldy

ShYMKENT. QazAqparat - Shymkentte úsh balanyń ólimine sebepshi bolǵan dezınfektor 5 jylǵa bas bostandyǵynan aıyryldy. 42 jastaǵy Bolat Jánibekov sot sheshimimen jazasyn qaýipsizdigi tómen túzeý mekemesinde óteıtin boldy, dep habarlaıdy QazAqparat tilshisi.

Aıyptalýshy Qylmystyq kodekstiń 304 babynyń 3-shi tarmaǵymen kináli dep tanylyp, jábirlenýshi tarapqa 5 mln teńge moraldik ótemaqy tóleýge mindetteldi. Sottalýshy úkimdi túzeý kolonııasynan onlaın rejımde tyńdady. Aıta keteıik, 11 aıǵa sozylǵan protseste Bolat Jánibekovtiń qylmystyq áreketi aıǵaqty zattarmen tolyq dáleldengen. Oǵan qosa birneshe kýágerler men jábirlenýshilerdiń bergen jaýaptary negizge alynǵan. Sot qos ulynan aıyrylǵan Taspolatovtar otbasyna ótemaqyny eki aıdyń ishinde tóleýi tıis boldy.

«Jábirlenýshi tarapynan talap aryz túsken. Sol talap aryz sottyń shemimen tolyǵymen qanaǵattantyrýǵa jatady. Óıtkeni, ol otbasynda tek 2 ul bala bolǵan. Sol 2 ul bala da qazaǵa ushyraǵan. Baldardyń ómiri árıne, ol aqshamen teńelmeıdi. Biraq, sot osy kórgen azaptaryn moraldik zalaldy olar kórsetken 5 mln teńgeni tolyǵymen ónidirge jatady dep tapty», - dedi sýdıa Svetlana Shynalıeva.

Aıyptalýshynyń tergeý kezinde ótkizgen árbir kúni eki kún dep belgilendi. Sondaı-aq, jándikterdi zalalsyzdandyrý jumysymen 3 jylǵa deıin aınalysýǵa tyıym salyndy.

Eske sala keteıik, qaıǵyly jaǵdaı ótken jyly qarasha aıynda tirkelgen bolatyn. Kópqabatty úıdegi páterlerdiń birinde zııankesterge qarsy zalalsyzdandyrý júrgizilgennen keıin bir otbasy aýrýhanaǵa túsip, onyń 11 aılyq jáne 4 jasar eki balasy kóz jumǵan edi. Al, eki aıdan keıin dál osy sottalýshynyń júrgizgen dezınfektsııasynan taǵy bir januıanyń 8 aılyq nárestesi baqılyq boldy.