Shymkentte úsh aýysymdyq mektepter máselesi tolyǵymen sheshiledi
ShYMKENT. QazAqparat - Shymkentte úsh aýysymdaǵy mektepterdiń máselesi jyl sońynda tolyǵymen sheshiledi. Bul týraly qala ákimi Nurlan Saýranbaev halyq aldynda esep berý jıynynda aıtty, dep habarlaıdy QazAqparat tilshisi.
Shahar basshysynyń sózine qaraǵanda, ótken jyly qaladaǵy 124 mektepti jáne úsh bilim uıasyn kúrdeli jóndeýge qarajat bólindi. Barlyq jumystar tolyǵymen aıaqtalyp, alty mektep pen 4 qosymsha ǵımarat paıdalanýǵa berildi. Taǵy jańa 5 mekteptiń qurylysy men 4 qosymsha ǵımarat salý jumystary bastalyp, ony aıaqtaý osy jylǵa josparlanyp otyr.
Sondaı-aq, Nurlan Saýranbaev barlyq mektepke baratyn joldarǵa jaıaý júrginshiler joldaryn salý, jaryqtandyrý, baǵdarshamdar jáne jol belgilerin ornatý týraly sheshim qabyldanǵanyn atap ótti.
«Balalardyń qaýipsizdigi, deniniń saý bolýy qashan da birinshi kezekte turatyn másele. Osyǵan sáıkes mektepke jaqyn joldar men kóshelerge taldaý júrgizilip, aýqymdy joba jasaldy. Birinshi kezektegi mańyzdy aýmaqtarǵa jaryqshamdar ornatylyp, jaıaý júrginshiler joly salynatyn bolady»,- dedi qala ákimi.
