Shymkentte úsh adamdy qaǵyp ketken polıtseıdiń kóliginen 4 qarýy tabyldy
Oblystyq prokýratýranyń málimetinshe, jol apatyn jasaǵan ishki ister qyzmetkeri Jandos Orazalıev ekeni anyqtaldy. Qaıǵyly oqıǵa oryn alǵan Mártóbe eldi mekeninde Jandos Orazalıev óziniń «BMW 520» kóligimen joldyń qarsy betine shyqqan. Sóıtip, bir otbasynyń múshelerin qaǵyp ketken edi. Nátıjesinde otaǵasy 37 jastaǵy Ǵalymjan Mahanov sol jerde jan tásilim etti. Al, Baǵıla Bókenbaeva men onyń uly Baǵdáýlet túrli dene jaraqatymen aýrýhanaǵa túsken bolatyn.
Kólikti qaraý barysynda polıtseıler 4 atys qarýyn tapqan. Tekserý barysynda tabylǵan qarýlar róldegi tártip saqshysynyń ómirden ozǵan ákesi Málik Orazalıevke tıesili bolyp shyqty. Qazirgi tańda Jandos Orazalıev ýaqytsha tergeý abaqtysyna qamalyp, onyń ústinen Qylmystyq kodekstiń eki birdeı babymen 345-«Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy, abaısyzda adam ólimine ákep soqqan is-áreket» jáne 287- «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» boıynsha is qozǵalǵan.
Tergeý sharalaryn oblystyq ІІD-niń ishki qaýipsizdik basqarmasynyń tergeýshileri júrgizýde. Aldyn ala jasalǵan saraptamalyq qortyndylarǵa sáıkes, kólik tizgindegen polıtseıdiń qan quramynan ishimdik pen esirtki zattar tabylmaǵan. Al, óńirdiń prokýrorlary qylmystyq isti óz baqylaýyna alyp, protsesýaldyq prokýror bólingenin málim etti.