Shymkentte urlaǵan 10 kólikti bólshektep satyp jibergen turǵyn ustaldy
ASTANA. QazAqparat - Shymkent qalasynda polıtseıler avtokólik urlyqtaryna qatysty kúdiktini quryqtady, dep habarlaıdy oblystyq ІІD baspasóz qyzmeti.
Aǵymdaǵy jyldyń basynda Shymkent QІІB Qarataý PB-ne 40 jastaǵy avtokólik ıesi Nursat móltek aýdanynda úıiniń aýlasynda turǵan «Deý Neksııa» markaly qyzmettik avtokóligin belgisiz tulǵa urlap ketkeni jóninde aryzdanyp kelgen.
Qarataý PB-niń qyzmetkerleri jedel-izdestirý is-sharasyn júrgizý barysynda qylmysqa kúdikti 1966 jylǵy Saıram aýdanynyń turǵynyn quryqtady. Buryn sotty bolǵan, jumyssyz. Polıtseıler kúdiktiniń úıin tintý kezinde urlanǵan avtokólikti tárkiledi.
Tergeý kezinde kúdikti azamattyń 10 avtokólik urlyǵyna qatystylyǵy anyqtaldy. Tártip saqshylar anyqtaǵandaı, 50 jastaǵy azamat qaraýsyz qalǵan avtokólikterdiń esigin arnaıy quraldardyń kómegimen ashyp, kólikterdi urlap otyrǵan. Urlanǵan kólikti satqan nemese bólshektep tómen baǵada satyp, aqshasyn óz qajetine jaratyp júrgen. Jábirlenýshige keltirilgen shyǵyn kólemi anyqtalýda.
Atalǵan jaıt boıynsha QR QK-niń eki babymen qylmystyq is qozǵaldy, QR 188-baby «Urlyq» jáne 200-baby «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý». Kúdikti qamaýda. Sotqa deıingi tergeý amaldary júrgizilýde. Kúdikti azamattyń ózge de qylmystarǵa qatystylyǵy tekserilýde.
