Shymkentte Uly dala órkenıetine arnalǵan halyqaralyq jıyn ótti
Ǵylymı konferentsııada Elbasy Nursultan Nazarbaevtyń «Uly dalanyń jeti qyry» baǵdarlamalyq maqalasynda aıtylǵan bastamalardy júzege asyrý joldary talqylanyp, qolǵa alynǵan ıgi sharalar saralandy. Alqaly jıyndy atalǵan oqý ornynyń rektory, akademık Darııa Qojamjarova ashyp, Memleket basshysy maqalasynda qazaq degen ulttyń halyqaralyq arenadaǵy ózindik orny bar ekenin aıqyndap bergenin atap ótti. Maqala elimizdiń tarıhı sahnada ótkeni men búgini jáne bolashaǵy zor ekenin anyqtaýǵa septigin tıgizgenin jetkizdi.
«Elbasy maqalasy Uly dala órkenıetiniń mańyzy men qundylyqtaryn tereń túsinýge, aýqymdy zertteýlerdi júrgizýge qazaqstandyq ǵana emes, ortalyq Azııa jáne túrkitildes qoǵamnyń nazaryn ózine aýdardy. Atalǵan maqala túp-tamyrymyzdy bilýge, ulttyq tarıhymyzǵa úńilýge múmkindik beredi. Konferentsııada ejelgi Túrkistan, Otyrar qalalarynyń, Uly Jibek jolynyń qundylyǵy, uly esimderdiń, oıshyldar men aqyndardyń, el bılegen tulǵalar beınesi keńinen talqylanady», - deıdi Darııa Qojamjarova.
Basqosýda 200-ge jýyq maqala taldanyp, plenarlyq jáne sektsııalyq májilisterde 67 baıandama tyńdaldy. Sonymen qatar, Túrkııanyń Marmara ýnıversıtetiniń professory Jengız Tomar men fılologııa ǵylymdarynyń doktory, professor Mekemtas Myrzahmetuly, belgili ǵalymdar Qulbek Ergóbek pen Muhtar Qoja, qoǵam qaıratkerleri Shalataı Myrzahmetov pen Áselhan Qalybekova syndy azamattar sóz sóılep, taǵylymdy oılarymen bólisti. Jıynǵa qatysýshylar plenarlyq otyrystan soń oqý ornynyń janyndaǵy «Muhtartaný», «Elbasytaný» ǵylymı-ádistemelik ortalyǵynyń qyzmetimen, onda qolǵa alynyp jatqan jobalarmen tanysty.
Sondaı-aq, shara aıasynda Áýezov ýnıversıteti ǵalymdary men stýdentteriniń ǵylymı jetistikteriniń kórmesi de kópshilik nazaryna usynyldy. Aldaǵy ýaqytta konferentsııa materıaldary negizinde arnaıy ǵylymı jınaq shyǵarý josparlanyp otyr.
