Shymkentte «Uly dala muragerleri» atty merekelik shara ótti
QR Táýelsizdiginiń 28 jyldyǵyna arnalǵan shara sahnalyq qoıylym túrinde ótkizildi, dep habarlaıdy QazAqparat tilshisi.
Kesh shymyldyǵy orkestrdiń oryndaýynda Seken Turysbektiń «Kóńil tolqyny» kúıimen ashyldy. Uly dala eliniń ulyq merekesine arnalǵan keshte saq dáýirinen táýelsizdikke deıingi eleýli oqıǵalar qamtyldy. Aldymen saqtar týraly beınebaıan kórsetilip, Altyn adam bıi jınalǵan qaýym nazaryna usynyldy. Keıin 12 myń shaqyrym qashyqtyqty jalǵap, shyǵys pen batysty baılanystyryp turǵan Uly Jibek joly týraly da mol maǵlumat berildi.
Saýda baǵyty elimiz úshin mádenı jáne ekonomıkalyq kópir bolǵany kerýen kórinisi arqyly kórermenge jol tartty. Sondaı-aq, ultaraqtaı jerimizdi naızanyń ushymen, bilektiń kúshimen qorǵaǵan batyrlardyń eren erligi sultandar keńesinde kórinis tapty. Asharshylyq jyldaryndaǵy qıyn-qystaý kezeńder de nazardan tys qalmady. Jeńiske jetken jaýyngerlerdiń qýanyshty sáti de sahnalandy. Qazaq jastarynyń kúresine aınalǵan jeltoqsan kóterilisi kórermenniń kóńilin bosatyp, janaryna jas toltyrdy. Osylaısha, eki saǵatqa sozylǵan keshte baıtaq jerdi búgingi urpaqqa amanat etken ata-babalardyń erligin jınalǵan jurt qaıta eske túsirdi. Sonymen qatar, merekelik sharada Elbasynyń ant qabyldaý saltanaty, Ata zań, ulttyq valıýta, Nur-Sultan qalasynyń boı kóterý sátteri kórermenniń kóńil túkpirindegi sezimniń qaıta jandanýyna sep boldy.
Kesh sońynda 28 jyl boıy táýelsizdiktiń besiginde terbelgen jalyndy jastar «Mekenim – Qazaqstan» ánin jappaı oryndap, ónersúıer qaýymǵa rýh syılady.